A la sombra’l Monte Fuyi

Masaomi Fuyita ye un director d’arte y diseñador gráficu xaponés nacíu nel 1983 na ciudá de Xizouka, que ta nel sur del país, ente Tokio y Osaka. Dende tola prefectura de Xizouka vese mui cerquina’l Monte Fuyi, la montaña más alta del país, un volcán con poques posibilidaes de cuspir llava que lu tuvieron siempre como un sitiu sagráu. La importancia del Monte Fuyi nel arte xaponés ye absoluta. La simetría de la so figura y la blancura de la nieve en contraste cola escuridá de la parte baxo’l monte ye daqué qu’inspiró la pintura y la poesía de tol país.

Tamién les pieces creatives del estudiu Tegusu, que fundó y dirixe Masaomi, tan inspiraes na pureza y simetría de formes del monte icónicu del archipiélagu. Les marques corporatives y los trabayos gráficos de Fuyita son perllimpios, delicaos y con un poco de redondez, reposando la mayor parte de les veces n’ilustraciones de trazu fácil y acertáu y en trabayos tipográficos perelegantes.

En Tegusu trabáyense los logotipos con caracteres tanto orientales como occidentales y gusten de representar figures d’animalinos de manera manso y prestoso. Nel diseñu de revistes y de llibros apuesten pola claridá na manera d’estremar los testos rompiendo’l blanco o’l negro con elementos pintureros. Los trabayos pa envases destaquen pola elegancia y tamién pola claridá, al xugar con pocos elementos que nun manchen nada los fondos blancos, lo qu’estrema muncho estos productos dientro del mercáu –mesmo occidental qu’oriental–, onde manda l’horror al vaciu.

Na cultura china y xaponesa, el 2017 va ser l’añu del pitu coloráu de fueu. Cuenten que nun va ser bon añu, pero eso ye creyer n’agüeros. Lo que cuenta ye facer les coses bien, con xeitu y con arte como lo fai Masaomi Fuyita.

Be the first to comment

Leave a Reply

Tu dirección de correo no será publicada.


*