Adolfo Camilo Díaz gana’l María Josefa Canellada de lliteratura infantil y xuvenil

Adolfo Camilo Díaz | Foto: Eduardo Carruébano
Adolfo Camilo Díaz | Foto: Eduardo Carruébano

El xuráu del Premiu María Josefa Canellada de lliteratura infantil y xuvenil n’asturianu decidió, por mayoría, conceder el gallardón del añu 2016 a la novela La mar, del escritor ayerán Adolfo Camilo Díaz. Esti premiu, que lleva’l nome de l’autora de Montesín, convócalu la Conseyería d’Educación y Cultura del Gobiernu asturianu y yá va pela novena edición.

El testu —que Díaz presentó baxo’l seudónimu Bahir— trata un tema social d’actualidá como ye’l de la emigración africana a Europa, presentáu, nesta novela, dende’l puntu de vista del protagonista, un adolescente que cuenta la so esperiencia «como si fuera un viaxe iniciáticu hacia la mar, real y metafórica», tal como reza nel acta del xuráu.

Adolfo Camilo Díaz (Caborana, 1963) sigue, con esta novela, un camín qu’empezó hai más de trenta años, con Añada pa un güeyu muertu (1985), ún de los clásicos contemporáneos de la lliteratura n’asturianu. Na so trayectoria como escritor —y anque tien tocao cásique tolos xéneros—, la narrativa xuvenil ocupa un sitiu destacáu na so producción, con títulos como Blugás, primer parte —y, de momentu, única— de la triloxía de ciencia-ficción Prímula; Khaos, onde recrea un ‘apocalipsis’ qu’empieza n’Asturies y col que ganó’l Premiu Montesín de lliteratura xuvenil 2006, o Memorial del monstruu, que-y valió repetir como ganador del Montesín nel añu 2010 y onde, a diferencia de los anteriores, echa la vista al pasáu pa narrar les aventures de maese Buciellos, cazador de cuélebres, y del so ayudante Antón.

Al Premiu María Josefa Canellada, dotáu con 3.000 euros, podíen presentase obres de lliteratura infantil o xuvenil en cualquier xéneru (noveles, colecciones de cuentos, obres de teatru o poemarios), siempre que tuvieren inédites y contaren con una estensión mínima de 250 versos (nel casu de la poesía) o 30 páxines a doble espaciu nos otros xéneros.

El xuráu d’anguaño, que presidió’l director xeneral de Planificación Llingüística y Normalización, Fernando Padilla, formáronlu los escritores y especialistes nel xéneru infantil y xuvenil Lourdes Álvarez García, Paz Fonticiella y Vicente García Oliva —que foi’l ganador de la edición anterior—, amás del alcalde de Cabranes, Gerardo Fabián, y el fíu de María Josefa Canellada, Alonso Zamora. Toos ellos aconceyaron el llunes 28 de payares na Casa Cultura de Cabranes, nel llugar de Santolaya.

Be the first to comment

Leave a Reply

Tu dirección de correo no será publicada.


*