Anabel Santiago gana’l IX Premiu al Meyor Cantar

Anabel Santiago

La cantante Anabel Santiago alzó, el vienres 30 de setiembre, la escultura La Payarina, de Maria Jesús García, que la acreíta como ganadora del IX Premiu al Meyor Cantar. El xuráu del concursu consideró, depués d’oyer les interpretaciones de los cinco finalistes, que’l tangu «La Lloca», con lletra del escritor Xulio Arbesú, yera la meyor composición orixinal n’asturanu o gallego asturianu de toles que se presentaron al concursu —que, anguaño, recoyía producciones editaes nel 2014 y el 2015, al nun convocase’l gallardón l’añu pasáu—.

Anabel Santiago defendió’l cantar nel escenariu del Auditoriu Municipal de La Pola Siero acompañada de los músicos Cristina Ponomar (violonchelu), Ana Fernández (violín), David Varela (acordión diatónicu) y Xulio Arbesú (guitarra). Pa toos ellos empieza, agora, un añu de promoción del cantar y de participación en festivales tanto n’Asturies como nel estranxeru, tal como establecen les bases pal grupu ganador del concursu.

Esta yera la segunda vez que la cantante, una de les voces más importantes de la tonada asturiana contemporánea, llegaba a la final d’esti premiu. La primera foi nel 2008, na Casa Cultura de Mieres, cola canción «Poema inacabáu». Xunto a Anabel, actuaron nel Auditoriu de La Pola los grupos Bacotexo, La Tarrancha y Vrienden y el cantante Fernando Valle Roso, toos ellos finalistes n’esta edición del certame.

Mentes se producía la deliberación del xuráu –formáu anguaño por Iván Iglesias, Marta Mori, Amparo Antuña Asenjo, Esther Fonseca, Aurelio Argel y Fernando Padilla, esti últimu en calidá de presidente, como director xeneral de Planificación Llingüística y Normalización–, el públicu asistente a la gala pudo disfrutar de l’actuación de la Banda de Gaitas «El Trasno», ganadores de la convocatoria anterior.

Les persones que nun pudieron asistir a la gala en directo —y les que, asistiendo, quieran recordar la esperiencia—, van poder ver la retresmisión del concursu que va emitir TPA esti domingu, 2 d’ochobre, a les 18:20 hores. Al cargu de la presentación del espectáculu tuvieron el músicu y productor Xune Elipe y la periodista María Cotiello.

1 Trackbacks & Pingbacks

  1. Anabel Santiago gana’l IX Premiu al Meyor Cantar | Tierra alantre, la mesma fala

Leave a Reply

Tu dirección de correo no será publicada.


*