Ángeles Carbajal. La fuercia de la poesía depurao

Ángeles Carbajal
Ángeles Carbajal

ALBERTO SUÁREZ
Ángeles Carbajal volvió a les llibreríes por suerte pa la cultura asturiana y volvió con otru poemariu n’asturianu, L’aire ente la rama. Esta creadora ye una de les llectures imprescindibles pa tol que quiera disfrutar de la meyor lliteratura na nuestra llingua. La voz de Carbajal ye serena, madura, y los poemes d’ella medren n’ausencia d’artificios y retóriques. Son directos y tienen la pureza de lo auténtico, la calidá del agua que cala por capes de tierra y roca pa condensase y convertise en manantial frescu que brota pa quitar la sede del saber y del sentir.

Axunta L’aire ente la rama poemes de pesu y ensin pose, como ye vezu na autora. Recuerdos ricos de la infancia y miraes atrás valientes qu’espliquen un poco lo inesplicable de la vida: lo que pasa tolos díes, lo que pasó siempre, lo que pasó un día y lo que ta por pasar. Guapura, ritmu, cantar. Una obra que ye un luxu.

Carbajal nació n’Argüelles, Siero, en 1959. L’aire ente la rama saco’l premiu Xuan María Acebal qu’entama’l Gobiernu asturianu, anque l’autora ya ganara’l premiu Teodoro Cuesta cola obra En campu abiertu, otra colección magnífica de poemes. Tamién tien obra publicao en castellanu: La caligrafía de la distancia (1993) y La sombra de otros días (2002).

L’aire ente la rama
Ángeles Carbajal
Impronta
Xixón, 2015
46 páxines

Be the first to comment

Leave a Reply

Tu dirección de correo no será publicada.


*