Anni Albers, texedora d’arte

Anni Albers nel estudiu del Black Mountain College, 1937. Fotografía: Helen M. Post | © The Josef and Anni Albers Foundation, VEGAP, Bilbao, 2017
Anni Albers nel estudiu del Black Mountain College, 1937. Fotografía: Helen M. Post | © The Josef and Anni Albers Foundation, VEGAP, Bilbao, 2017

La esposición Tocar la vista, que se puede ver hasta’l 14 de xineru del 2018 nel Muséu Guggenheim de Bilbao, val pa porponer una aproximación con bien de detalle a la obra d’Anni Albers (Berlín, 1899 – Orange, Connecticut, EE. UU., 1994), artista que se distinguió polo orixinal del trabayu pictóricu y testil y pol conocimientu de los materiales y técniques de texer nos telares, una maera de producir coses tan vieya como’l mundu.

Pol añu 1922, Anni Albers taba matriculada na escuela Bauhaus de Weimar. Cuando la Bauhaus la zarró’l partíu nazi nel 1933, Albers marchó a vivir pa Carolina del Norte, EE. UU., y allá foi profesora d’una escuela llibre recién abierta que se diba convertir nun referente de la modernidá d’América del Norte, el Black Mountain College.

Anni Albers: tocar la vista faise como un homenaxe a la mirada táctil y emocional d’una artista que buscó siempre la pureza conceptual y la claridá na realización del trabayu. La esposición repara nos períodos de creación y series d’obres diferentes de la trayectoria d’Anni Albers, faciendo por rescamplar los motivos y idees que más repitía xunto con otres creaciones esperimentales. La muestra enseña nel Muséu Guggenheim de Bilbao la fuercia d’una artista que tinía un pensamientu humanista y esencial que marcó muncho nel arte de los tiempos d’ella y de xeneraciones d’artistes que vinieron depúes.

Entamada en collaboración con The Josef and Anni Albers Foundation, esta esposición sorraya’l papel de pionera d’Albers nel resurdimientu modernu del arte testil (Fiber Art). L’artista inspiróse nes cultures precolombines y na industria moderna, aunque’l trabayu d’ella trescendió les nociones d’artesanía y de llabor propia del xéneru femenín. Amás de facer innovaciones nel tratamientu de les trames testiles y una investigación de motivos permanente y de les funciones del tapíu, Albers llogró posicionase frente al papel dominante de la pintura a cuenta los textiles y el grabáu, que yeren considerados «xéneros menores». Nel empeñu que tenía por consiguir un contactu de verdá col oxetu, Albers tamién ayudó a redefinir la obra d’arte como diseñu reproducible, ofreciendo al públicu una mayor accesibilidá a la producción de la pieza artística.

Be the first to comment

Leave a Reply

Tu dirección de correo no será publicada.


*