Antón García. Novelar la pena de muerte

Crónica de la lluz y la solombra ye una narración lliteraria d’Antón García basada en fechos históricos: la condena a pena de muerte en garrote vil de Rafael Gancedo pol asesinatu de la muyer y un neñu recién nacíu. El sucesu fatal asocedió nel llugar de La Zorea, na parroquia de Xinestaza, que ye la que ta más al sur del conceyu de Tinéu, nel Cuartu la Riera. Los parricidios asocedieron en xunu de 1897 y la execución del reu en plaza pública fíxose’l mesmu mes de dos años depués, na villa de Tinéu, a manes del verdugu Gregorio Mayoral.

Antón García ye de Tuña, de mui cerca de La Zorea, y sintió falar d’estos fechos dende neñu porque foi un crime y una execución que caló nes memories de la xente de Tinéu y de toa Asturies, gracies a la cobertura informativa que-y dedicaron los periódicos de la época n’Uviéu y en Xixón. Amestando les fontes orales y les escrites, l’autor pon nome y apellíos a tolos protagonistes d’una historia qu’escuende tamién munchu amor, odiu, y deséu carnal. Cola fuercia de los fechos reales y la de la ficción creativa, Antón García tira de la cuerda d’una peonza que xira ensin parada, clavando’l ferrón na miseria d’unes vides y unes muertes crueles y inocentes. A cada vuelta vemos a los personaxes d’esta novela coral declarando lo que que toos saben y naide foi quién a ver. Y mentes la verdá y les mentires rueden, sabemos muncho más d’una dómina negra como la fame y los llutos.

Rafael Gancedo depués d'axusticiáu.
Rafael Gancedo depués d’axusticiáu.

Crónica de la lluz y la solombra sacó’l premiu Xosefa de Xovellanos de novela, qu’entama’l Gobiernu asturianu, y que ye’l más importante de los que se conceden cada añu. Narrada n’asturianu estándar, dellos de los protagonistes mándense de la variante occidental, el rexistru idiomáticu d’ellos. La edición d’esta obra ye pola cuenta de Saltadera y recupera dos testimonios gráficos importantes: dos semeyes de Rafael Gancedo, una fecha na cárcel d’Uviéu y otra na Plaza de Las Campas de Tinéu –depués d’axusticiau–, n’esposición pública.

Portada Crónica…Crónica de la lluz y la solombra
Antón García
Saltadera
Uviéu, 2015
185 páxines

Be the first to comment

Leave a Reply

Tu dirección de correo no será publicada.


*