Arranca’l crowfunding p’abrir Manglar, un espaciu autoxestionáu n’Uviéu

Manglar, ecosistema cultural

Un equipu de más de 70 persones lleva meses trabayando p’abrir Manglar, un espaciu nuevu n’Uviéu «dedicáu a la confluencia y l’alcuentru de persones, a la cultura y a la tresformación social, con actividaes orientaes a persones de toles edaes», según señalen na páxina web del proyectu. Pa poder facer frente a la inversión inicial, ta abierta una cuenta de crowfunding en Verkami, onde cualquier persona pue aportar una contribución y recibir, a cambiu, una ‘recompensa’ cuando s’abra l’espaciu.

El local, que s’asitia na Cuesta la Noceda –onde taba’l bar Calleja La Ciega–, tien dos plantes: na superior va tar instaláu un bar-cantina-chigre, onde se va apostar pola comida sano y los productos a precios populares, mentes que, nel pisu de baxo, van desenvolvese les actividaes sociales y culturales, que van tar abiertes a tola ciudá, a los movimientos sociales, a toles espresiones de la cultura popular, el debate, el pensamientu críticu, el baille y la folixa.

Amás, el local cuenta con una terraza-xardín que los sos promotores quieren convertir nun oasis verde en mediu de la ciudá, un sitiu pa tomar daqué, disfrutar d’actividaes al aire llibre y provistu d’un güertu urbanu que suministre productos a la cocina del local, una cocina que va tar nes manes de Carla Soto, de Nahual Comida Vexetariano. L’equipu que ta tres de Manglar cuenta con que’l centru social y cultural se financie cola estaya d’hostelería del proyectu (que se va completar con talleres de comida saludable), amás de coles fiestes que se vayan organizando al cabu del añu.

Detrás de Manglar hai un conxuntu de persones con esperiencia abondo nel terrén social y cultural; la mayoría tuvo venceyao a espacios como La Madreña, La Caja Negra, Local Creativo Paraíso, Lata de Zinc o La Ciudadana, o a iniciatives d’economía nuevo como Coop57. Esta esperiencia tien muncho que ver col enfotu de los promotores de que Manglar non solo se xestione de manera participativa y democrática, sinón que sía quién a xenerar empléu dende la economía social.

Les reformes nel local principiaron yá nel mes d’agostu, una xera pa la que contaron con carpinteros locales, al mesmu tiempu que siguieron criterios de sostenibilidá, de manera tala que nun s’usaron barnices abrasivos y la madera foi reutilizao o, cuando se tuvo que recurrir a madera nuevo, que fuera d’impactu ambiental baxu. A estes altures tamién tienen saniada la güerta, d’onde sacaron a mano más de cinco tonelaes d’escombru y vidru. Cuenten con que, a lo llargo del mes d’avientu, tean acabaes les estayes onde se van facer los talleres de cultivu ecolóxicu pa tola familia.

L’apertura de puertes de Manglar va consolidar la Cuesta la Noceda como un centru de desenvolvimientu social y cultural n’Uviéu, al axuntase a otros espacios que lleven funcionando dende hai bien de tiempu nesta cai, como’l Local Cambalache o l’espaciu creativu Decero.

Be the first to comment

Leave a Reply

Tu dirección de correo no será publicada.


*