Arranquen los actos alredor de los Premios Princesa d’Asturies col ciclu de teatru n’homenaxe a Espert

Les actividaes culturales que preceden a la selmana de los Premios Princesa d’Asturies empiecen el xueves, 13 d’ochobre, col empiezu del ciclu de teatru «Ser o no ser Espert (Ser o nun ser Espert)», un homenaxe a l’actriz, directora y productora teatral Núria Espert, gallardonada anguaño na categoría d’Artes. El programa del ciclu va constar de dos montaxes inspiraos na trayectoria de la premiada: Espectros (Hamlet) y Asesinas ejemplares (Asesines exemplares).

La primer función del ciclu va ser a les 20:00 hores del xueves 13 d’ochobre, nel Teatru Arango de Xixón (Cai de La Mercé 43). El coliséu xixonés va abrir p’acoyer la representación d’Espectros (Hamlet), una versión reducida de Hamlet, de William Shakespeare, un personaxe al qu’Espert non solo dio vida como actriz, sinón que foi la primer muyer en facelo n’España. La dirección ta al cargu de l’actriz y directora asturiana Marga Llano. La obra va volver representase, nel mesmu escenariu, el vienres 14 a les 20:00 y les 23:15 hores.

La otra obra del programa, Asesinas ejemplares (Asesines exemplares), lleva producción d’Etelvino Vázquez, ún de los directores más veteranos de la escena teatral asturiana. El montaxe recrea escenes d’obres relevantes na carrera d’Espert, que van tener como denominador común el tar protagonizaes por muyeres que, por motivos estremaos, vense abocaes a cometer un crime. El públicu va poder disfrutar de clásicos como Medea, d’Eurípides; Yerma, Doña Rosita la soltera y La Casa de Bernarda Alba, de Federico García Lorca, o Las criadas (Les criaes) de Jean Genet.

Les representaciones d’Asesinas ejemplares (Asesines exemplares) van facese nel Archivu Históricu d’Asturies (Cai del Arcipreste d’Hita, s/n), asitiáu na vieya Cárcel Modelu d’Uviéu, y al que, pa la ocasión, namás se va poder acceder peles galeríes de lo que foi’l módulu de muyeres. L’estrenu va ser el 14 d’ochobre a les 20:00 hores y va repetise’l pase’l sábadu 15 a la mesma hora.

Be the first to comment

Leave a Reply

Tu dirección de correo no será publicada.


*