Berta Piñán gana, por unanimidá, el María Josefa Canellada de lliteratura infantil y xuvenil

Berta Piñán.
Berta Piñán.

La obra Vida nel campu, de la escritora Berta Piñán, ganó tolos apoyos del xuráu pa convertise nel X Premiu María Josefa Canellada de Lliteratura Infantil y Xuvenil en llingua asturiana, que concede la Conseyería d’Educación y Cultura. Los miembros del xuráu reconocieron nesti testu, presentáu baxo’l seudónimu Teyín, «una obra notable qu’escuende denuncia pero que nun s’enllena de proclames innecesaries» y onde’l llector «participa de los mesmos descubrimientos que los personaxes y dexa’l xuiciu éticu pal remate de la llectura», según reza nel acta.

Nesta ocasión, el xuráu formáronlu Fernando Padilla Palicio, director xeneral de Planificación Lingüística y Normalización, como presidente; Adolfo Camilo Díaz, ganador de la edición anterior; la escritora y especialista en lliteratura infantil y xuvenil Maite González Iglesias; l’alcalde de Cabranes, Gerardo Fabián; el fíu de la escritora María Josefa Canellada, Alonso Zamora, y l’asesora técnica del Serviciu de Planificación Llingüística y Normalización, Juncal García Velasco, en calidá de secretaria. Toos ellos aconceyaron el martes 21 de payares na Casa Conceyu de Cabranes, como ye vezu nesti premiu.

A esti gallardón, que ta dotáu con 3.000 euros, podíen presentase obres de lliteratura infantil o xuvenil de cualquier xéneru (noveles, compilaciones de cuentos, obres de teatru o poemarios) siempre que fueren inédites y tuvieren una estensión mínima de 250 versos, nel casu de la poesía, y de 30 páxines a doble espaciu nos otros xéneros.

Berta Piñán (Cañu, 1963) destaca como una de les voces más sólides del surdimientu lliterariu asturianu. Profesora de Llingua y Lliteratura y académica de la llingua asturiana, la so carrera lliteraria empezó nel terrén de la poesía, con títulos imprescindibles yá nel canon lliterariu, tal como Al abellu les besties (1986), Vida privada (1991), Temporada de pesca (1998), Un mes (2002) y La mancadura (2010), esta última publicada n’edición billingüe asturianu-castellanu. Sicasí, el llabor como escritora de Piñán estiéndese tamién al territoriu de la narrativa curtia, onde destaquen obres como La tierra entero (1995) o La maleta al agua (2005).

Piñán, que yá fuera ganadora de la primer edición del Premiu María Josefa Canellada cola obra Arroz, agua y maíz (2009), ye autora d’otros trabayos destinaos al públicu infantil y xuvenil, como Lula, Lulina (1996), El branu de Mirtya (2005), Tres sieglos construyendo la igualdá (2005), Les coses que-y presten a Fran (2008), L’estranxeru (2009) y La mio hermana ye una mofeta (2011).

Be the first to comment

Leave a Reply

Tu dirección de correo no será publicada.


*