Camín de Compostela… pela mar

La historia y la mitoloxía de los países celtes tán enllenes de viaxeros que, xubíos a una barca, crucien el mar camín de les tierres afortunaes, les isles de los bienaventuraos, en dirección aonde’l sol s’escuende. Ye’l casu de san Brendan (el nuestru san Balandrán), del obispu Mailoc y de tantos otros que, dende Irlanda, Gran Bretaña y l’Armórica, navegaron, en paralelo a la costa atlántica, hasta la fin del mundu, una meta que, a partir del sieglu IX, diba identificase col sepulcru del apóstol Santiago en Compostela.

Anguaño, cuatro pelegrinos irlandeses recuerren el mesmu camín, d’Irlanda a Galicia, pasando peles costes de Gales, Cornualles, Bretaña, Aquitania, País Vascu, Cantabria y Asturies hasta arribar a la ría del Sar, el mesmu sitiu onde la tradición diz que los discípulos desembarcaron el cuerpu del apóstol. La compañía que fai el viaxe paez tamién sacada d’una saga celta: Domhnall Mac Síthigh, poeta; Breandáin Ó Beaglaoich, músicu; Liam Holden, pintor, y Breandáin Ó Mhuircheartaigh, constructor.

El mediu de tresporte ye un bote de madera tradicional, conocíu n’Irlanda pel nome de currach, fechu artesanalmente y recubiertu de llenzu y brea. A esta barca, mui asemeyada a la qu’usaron los navegantes irlandeses de sieglos pasaos, tamién se-y llama, en delles zones d’Irlanda, naomhóg, que quier dicir «la santina», un nome bien apropiáu pal llabor que tien que facer: llevar salvos a los sos ocupantes hasta’l destín marcáu.

 

Los Picos d'Europa dende'l naomhóg. Foto de la páxina de Facebook del proyectu.
Los Picos d’Europa dende’l naomhóg. | Foto: Páxina de FB del proyectu.

Nel casu de Domhnall, Liam y los dos Breandáin, el viaxe empezó en mayu del 2016 y ta trescurriendo a lo llargo de 700 kilómetros y munches paraes nes villes y aldees de la costa, onde acampen y cocinen enantes de siguir la ruta. Nel casu d’Asturies, Tazones, Cuideiru, L.uarca o Veiga foron dellos de los puertos que vieron arrivar el currach.

Esti grupu semó la sorpresa en tola xente qu’atoparon, como se pue ver nel videu de presentación de la so aventura, al final d’esti artículu, pero tamién foi una fonte d’inspiración pa munches persones, qu’almiraron la so bravura y constancia tanto como les histories que-yos contaron, la música y la poesía qu’interpretaron, como si acabaren de surdir de la borrina de la historia.

Sicasí, y a diferencia de los sos predecesores, l’aventura d’estos cuatro homes nun va quedar namás na memoria de les persones coles que coincidieron a lo llargo del viaxe, sinón que tol proyectu desenvolvióse en collaboración con TG4 –la canal de televisión irlandesa en llingua gaélica– y la productora Phoenix Films. A la espera de que salga’l documental, la productora independiente Anú Pictures, col apoyu técnicu de RTE –la televisión pública irlandesa– ufren un adelantu de la odisea d’estos heriedes de Brendan el navegante, a los que tamién se pue siguir al traviés de la so páxina de Facebook.

 

Be the first to comment

Leave a Reply

Tu dirección de correo no será publicada.


*