Cantares bestiales

ALBERTO SUÁREZ
La Fabriquina Creaciones Culturales ye la responsable de qu’en 2015 s’editara Bestiariu, un discu pa neños y neñes y p’adultos con diez pieces n’asturianu sobre bases musicales de dellos estilos contemporáneos y qu’interpretaron diez grupos diferentes. Cada canción taba dedicada a un animal. El formatu foi un éxitu y cantaron nel idioma’l país formaciones que nun suelen facelo na so carrera musical y que tampoco componen davezu pa la xente menudo.

N’avientu de 2016, La Fabriquina repitió fórmula con Bestiariu II, anque los grupos que grabaron son toos nuevos menos ún. Nel discu hai doce cantares, de Nacho Vegas (col coru de Reciella), Elle Belga, Mona, Muga, Lavandera, L@s electric@s, La Bande, La Bonturné, ¿Aú?, Arma X, Skama la Rede y Herbamora, que representen estilos musicales mui estremaos pero que, na escena asturiana, ye normal que tean mui mecíos: indie, pop, rock, folk, hip-hop, ska, música tradicional, etc.

Carátula de ’Bestiariu II’
Carátula de ’Bestiariu II’

Los animalinos protagonistes d’esti bestiariu son l’hipopótamu, la raposa, el tamarino, la mona, la xata, el gatu, el cámbaru, la xaronca, el perezosu, la caparina, el puercuspín y la lluciérnaga. Toles ilustraciones de los animales y el diseñu gráficu del discu son obra del diseñador Marco Recuero, como yá pasara en Bestiariu I. Un trabayu que tamién ye de destacar polo finu que ye.

Lo más importante de Bestiariu ye qu’edita canciones de munchu valir, con lletres pegadices, que cuenten histories entreteníes d’animalinos y que tienen calidá musical. Pero igual d’importante qu’esto ye que gusta tamién a los padres y madres, y eso ye daqué básico pa que los neños canten y deprendan cantares n’asturianu de la que lo pasen en grande. Ye fundamental que cante tola familia porque los neños ye más fácil que faigan con gustu lo que ven facer con gustu a los de casa.

Be the first to comment

Leave a Reply

Tu dirección de correo no será publicada.


*