Cantares y rezos

Foto: Neil Tackaberry.
Foto: Neil Tackaberry.

ALBERTO SUÁREZ
Pémeque nun hai diferencies ente dellos cantares y dellos rezos. Cantares y rezos valen pa porfiar en consiguir lo que se quier y nun se tien. La mayor parte de les veces que lloramos, el nuestru llantu ye por nosotros, pola pena que mos damos, pola pena de nun tener lo que queremos, lo que merecemos, lo que cansamos por ser quien a consiguir y nun consiguimos. Lo que nun mos dan y bien podíen damos. Lloramos porque queremos y nun nos quieren, y nun hai llantu nin querer más inútil. Cantares y rezos nun valen pa trunfar, valen pa calmanos, pa poder vivir coles nuestres faltes, coles ausencies, coles penes. Valen pa conformamos. Hai tamién cantares allegres –nel repertoriu asturianu, los menos– y rezos de gratitú.

Cantares bien musicales y rezos bien necios son los Poemes pa nueches de media lluna, de Moisés Cima (Uviéu, 1983), un poeta mui nuevu pero fechu y derechu. Un home con una gran voz poética que ronca la pata a la lluna pa que l’amada sepa lo que la quier ensin qu’ella lu correspuenda, pa que la so tierra escuche que’l pasáu nun vuelve y que’l futuru nun va. Cantares de muncha pena, pena de vida qu’escapa, escapaes que son suaños y espertares que son poemes d’un exiliau. Poemes enllenos de palabres d’amor, d’ilusión serena y arrogante, de sonrises, d’alegaciones xustes que piden un poco de bon xuiciu y un indultu pa los nobles, que saben querer de frente, de boca y de corazón.

Poemes pa nueches de media lluna ye un gran llibru, que bien merecío tien el llevar el premiu «Fernán Coronas» nel 2015. Presta atopar un poemariu tan redondu, con tantos fueos ardiendo y nengunu artificial, escritu por un rapaz que sabe cuála ye la midida xusta de les coses, porque nel procesu creativu d’escribir –y en toles coses, en xeneral, de la vida– tan importante como saber facer ye saber midir, y Moisés Cima sabe, sabe nun ser un estiráu con poses aprendíes, saber nun ponese trescendental a lo fato, sabe conservar el ritmu y sabe qu’escribe pa canta-y a la vida y non pa oyese. Y gasta una frescura que fai muncho más fonda la so pena y muncho más radiante’l so gociu.

Cubierta_Poemes_media_llunaPoemes pa nueches de media lluna
Moisés Cima
Trabe, 2016
69 páxines

Be the first to comment

Leave a Reply

Tu dirección de correo no será publicada.


*