Casona de Mazonovo. Hotel y mesón

Na ufierta hotelera y hostelera de Santalla d’Ozcos destaca la Casona de Mazonovo, una edificación del sieglu XVIII compuesta por dos conxuntos arquitectónicos xuníos por una corrada con escalera que da pasu a les dos plantes nobles del pisu d’arriba. La mayor d’elles ye la conocida como Casa de Gomelle, que yeren les cuadres antiguamente y agora ye mesón, mentes que na más pequeña, conocida como Casa da Sapeira, tán el restu de cuartos y dependencies.

El Mesón L’Auga, que ta nes instalaciones de la casona, tien un comedor con capacidá pa venticinco persones y una terraza grande. Sirve comida casero fecho con productos de la zona más occidental d’Asturies. La casona tamién ye tienda y viende productos agroalimentarios y artesanía fecho na redolada, ente lo que destaquen la cerámica, el cuero, les navayes –tan famoses–, el miel, los llicores, les marmellaes y les setes cuando ye la temporada.

Los propietarios suañaben con llibrase de les corbates, los horarios maratonianos y la dependencia de la xefatura, asina que decidieron entamar un negociu propio pa dir viviendo nuna zona onde, lloñe de les urbes grandes, la naturaleza sana mandara.

Be the first to comment

Leave a Reply

Tu dirección de correo no será publicada.


*