Conciencia de pecáu

«La vida ye esa esclava qu’obedez a la realidá». Asina empieza la Escena I de la novela de Xurde Álvarez Si’l temblor niega’l fríu, una narración que se desenvuelve na guardilla d’un sanatoriu psiquiátricu de l’Alemaña nazi al tiempu de la II Guerra Mundial. La realidá ye, nesti casu, el sacrificiu de los más febles –neños con enfermedaes conxénites, discapacitaos, enfermos mentales, vieyos…– nos altares d’una ideoloxía que consideraba les sos vides indignes de vivise. La vida ye la de los otros, los que queden, sobre manera, la d’aquellos que tienen qu’aplicar les directrices que marquen los amos del réxime —los ídolos de la realidá—.

A primer vista, pue paecer que la conciencia queda escluida d’esta rellación –d’esta ecuación, por usar una imaxe qu’Álvarez emplega na novela–, sicasí, tola narración pue considerase un llargu exame de conciencia, un cantu callandino –pero non por ello menos verdaderu– del mea culpa. Por munches escuses que pongan, les protagonistes de Si’l temblor niega’l fríu saben bien que la realidá nun esculpa de nada, y muncho menos va redimir a naide de los pecaos propios.

El diálogu ente los dos personaxes –la señora Eich, una enfermera moza, y la señora Böll, enfermera xefe– va sucediéndose a partir de los argumentos encendíos de la señora Eich a favor de la política d’eutanasia del réxime nazi, a los que la señora Böll presenta, primero, el silenciu; llueu la dulda sobre la bondá d’eses teoríes, y, a lo último, la so propia esperiencia como participante activa na aplicación d’eses polítiques.

La conversación algama, en dellos momentos, niveles de desasosiegu talos que lleven a aparar la llectura pa poder garrar fuelgu. Sicasí, lo que más horror provoca nun ye tanto’l rellatu de les atrocidaes del réxime nazi como’l dir decatándose de que nenguna sociedá ta inmune a lo qu’asocedió n’Alemaña ente 1939 y 1945, si se dan les condiciones amañoses –ente elles, la gradualidá na aplicación de les midíes y la ocultación de los aspectos más escabrosos–.

Xurde Álvarez (Sama Llangréu, 1973) ye poeta, narrador y autor de testos teatrales. Tien editaos los poemarios La sema (1999), Tierra d’esperanza y La caída (entrambos los dos del 2008); la novela No fondero de l’alcordanza de Dios (2004), y la obra dramática Les llames del to llar antiguu (2005).

 

Portada de Si'l temblor niega'l fríu Si’l temblor niega’l fríu
Xurde Álvarez
Trabe, 2014
134 páxines

Be the first to comment

Leave a Reply

Tu dirección de correo no será publicada.


*