Convócase’l IX Premiu al Meyor Cantar n’asturianu y gallego-asturianu

La Conseyería d’Educación y Cultura del Gobiernu d’Asturies recupera, anguaño, la convocatoria del Premiu al Meyor Cantar. Esti gallardón, que se venía concediendo tolos años dende’l 2007, viera interrumpida la so cellebración l’añu pasáu, cuando nun se llegó a convocar. Por esti motivu, na convocatoria del 2016 van poder presentase tolos cantares escritos n’asturianu o gallego-asturianu que se comercializaren non solo nel 2015, sinón tamién nel 2014, cola condición de que sían obres musicales de creación orixinal tanto na lletra como na música.

Esti premiu, qu’algama anguaño la so novena edición, creóse col enfotu de visibilizar el talentu de los creadores musicales qu’usen la llingua asturiana o’l gallego-asturianu, amás d’afalar la composición de cantares nuevos nestes llingües. Por esti motivu, esclúyense de la convocatoria les pieces tradicionales, les versiones o adaptaciones d’obres de creación publicaes orixinalmente n’otra llingua y los cantares que nun s’editaren o grabaren pela primer vez nel tiempu al que fai referencia la convocatoria.

Los grupos y solistes tienen de plazu hasta’l 15 de xunetu pa presentar les solicitúes de participación, qu’han facese según el modelu normalizáu incluíu como anexu de la convocatoria. Amás, habrán d’aportar un CD onde se recueya’l cantar escoyíu pa concurrir al premiu, el currículum del solista o grupu –incluyendo rellación nominal de componentes y instrumentos que toquen– y la lletra de la canción, debidamente mecanografiada.

La escoyeta del cantar ganador va tener dos fases. La primer fase va consistir nun llabor de preselección, onde los miembros del xuráu van puntuar a caún de los cantares que s’axusten a lo estipulao nes bases. Les canciones que llogren la puntuación global más alta –y que nun puen ser menos de cinco– van ser consideraes finalistes.

 

La gala, en setiembre del 2016

Banda de Gaitas El Trasno | Foto: Palmira Escobar.
Banda de Gaitas El Trasno | Foto: Palmira Escobar.

La segunda fase va consistir na actuación en directo de caún de los músicos o grupos finalistes, dientro d’una gala que se va celebrar a últimos del mes de setiembre del 2016. Depués de les actuaciones, y tres d’aconceyar el xuráu pela última vez, va facese públicu’l fallu. Al consistir esta segunda fase nuna actuación en directo, los finalistes asumen la obligación de participar na gala d’entrega. Nel casu de que dalgún de los intérpretes seleccionaos na primer fase nun pudiera asumir esti compromisu, va escoyese al siguiente de los concursantes que tuviera la puntuación mayor, hasta completar el númberu de finalistes.

L’intérprete o grupu ganador va recibir como premiu una escultura orixinal y esclusiva d’un o una artista asturiana de prestixu reconocíu. Amás, el Gobiernu d’Asturies va mirar pola promoción y difusión del cantar nos medios de comunicación y nos actos qu’entame o promueva’l propiu Gobiernu.

Los ganadores de la última edición hasta la fecha del Premiu al Meyor Cantar fueron la Banda de Gaitas El Trasno, col tema «Volviche», que defendieron nuna gala celebrada’l 14 de marzu del 2014 nel Teatru de la Llaboral, en Xixón.

La convocatoria completa y el modelu de solicitú puen descargase dende esti enllaz.

Be the first to comment

Leave a Reply

Tu dirección de correo no será publicada.


*