Cristóbal Soler imparte un cursu de dirección musical en Torazu

Cristóbal Soler

L’hotel rural y restaurante Los Llaureles, de Torazu (Cabranes), va acoyer, ente’l 4 y el 8 de xunetu, el I Cursu de Dirección y Interpretación Musical, qu’imparte’l maestru Cristóbal Soler, que fuera, hasta finales del 2015, director musical del Teatru de la Zarzuela de Madrid. A Soler va asistilu na dirección l’uviedín Gaspar Muñiz Álvarez.

La principal novedá d’esti cursu ye que, tolos díes, la última clas, programada pa les 22:30 hores, va tar abierta al públicu y nella van poder participar toles persones asistentes. Esta característica esplícase pol enfoque col que’l maestru Soler diseñó la formación, onde non solo ye importante l’estudiu previu de la obra, sinón tamién una contextualización amañosa y una interpretación que s’axuste al públicu receptor.

«La vitalidá de la interpretación d’una obra musical depende, d’una manera particular, de que la rellación ente l’autor, el músicu y l’oyente sía acordies a la obra, la situación y el momentu», señala Soler pa xustificar esta apertura al públicu.

Amás, el vienres 8 de xunetu, a les 20:00 hores, va celebrase’l conciertu de clausura na ilesia de san Cristóbal el Real de Colunga, onde se van interpretar obres de Gioachino Rossini, Alessandro Marcello, Johann Sebastian Bach, Georg Friedrich Händel y Francesco Corselli. Esti conciertu va contar tamién cola participación de la mezzosoprano Lorena Valero, ganadora del premiu estraordinariu Grandi Voci nel 2011, ente otros munchos llogros.

Nesta primer edición tán matriculaos cuatro directores d’orquesta mozos y un grupu de catorce intérpretes llegaos de tol Estáu, que van trabayar dellos aspectos técnicos, amás de los criterios artísticos de los que se tien que mandar la dirección musical.

Consideráu ún de los directores más importantes de la so xeneración, Cristóbal Soler tien desenvuelto una carrera mui estensa dientro del repertoriu sinfónicu y operísticu. La crítica destaca’l so carisma y interpretación, amás de la so técnica de dirección consolidada y precisa. Esta ye’l resultáu de la formación sólida y rigorosa recibida en Viena a lo llargo d’una década y de la mano de directores del altor de Harnoncourt, Sawallisch, Prêtre, Vladimir Fedoseyev o Mariss Jansons.

Be the first to comment

Leave a Reply

Tu dirección de correo no será publicada.


*