Cuasi la metá de los centros educativos asturianos cuenten con programa billingüe

La Conseyería d’Educación presentó’l martes 29 de payares un informe sobre la implantación y los resultaos del Programa Billingüe n’Asturies, pol que los escolinos, tanto de Primaria como de Secundaria, reciben delles materies non llingüístiques (como Ciencies de la Naturaleza, Educación Física o Matemátiques) n’inglés o francés. Esti estudiu señala que, dende qu’empezó –gracies a un conveniu col British Council nel añu académicu 1996/1997–, pasóse de 2 centros a 217 nel cursu 2015/2016, onde s’inclúin tanto Institutos d’Educación Secundaria y escueles públiques como centros concertaos. Estos númberos suponen cuasi’l 50% de la rede educativa asturiana.

Según se saca de los resultaos del informe, que ta disponible na páxina web educastur.es, el programa billingüe ta contribuyendo a meyorar los resultaos académicos del alumnáu de Primaria y Secundaria, con unes tases de promoción a favor de los escolinos del programa billingüe d’ente’l 0,7% y el 2,1% n’Educación Primaria, y del 11,5% en Secundaria.

Amás, el documentu señala que l’aprendimientu de les materies non llingüístiques que s’imparten nel idioma estranxeru nun se resiente. Asina, los estudiantes del programa billingüe llograron meyores resultaos na evaluación de diagnósticu del añu 2013 non solo nes competencies llingüístiques y n’inglés, sinón tamién nes competencies matemática y de conocimientu y interacción col mundu físicu. Esti factor, ente otros, fai que les families muestren un grau altu de satisfacción col programa, según indicó na presentación del informe’l conseyeru d’Educación, Genaro Alonso, qu’aseguró que se va siguir apostando pol billingüismu na escuela asturiana.

N’Educación Primaria, les materies que s’imparten nuna llingua estranxera son Ciencies de la naturaleza, Ciencies sociales, Conocimientu del mediu, Educación artística y Educación física, que faen un total de 1362 unidaes billingües; mentes que n’ESO, les materies que se encuadren dientro del programa son Matemátiques, Ciencies sociales, Ciencies de la naturaleza, Música, Educación física, Teconoloxía y Educación plástica, que suponen un total de 592 unidaes billingües.

Nel estudiu, qu’ellaboraron el Serviciu d’Inspección Educativa y la Dirección Xeneral d’Ordenación Académica y Innovación Educativa de la Conseyería d’Educación, participaron 109 centros, que suponen un total de 388 aules billingües. Hai que recordar que, anque la enseñanza billingüe n’Asturies tien orixe nel conveniu col British Council del añu 1996, el Programa Billingüe arranca de manera esperimental nel añu 2004 y, nel 2008, consolídase y espárdese pela rede de centros.

Be the first to comment

Leave a Reply

Tu dirección de correo no será publicada.


*