Denos l’aguilando señora pur Dios, ya pul nacimientu del fíu de Dios

La parroquia de San Xuan de Villapañada, en Grau, recuperó depués d’ochenta años ensin facese la salida de los aguilandeiros a pidir peles cases de los llugares que la formen: Rozadas, Acebéu, La Llinar y San Xuan. Primero d’esto hubo un trabayu d’investigación y recuperación etnográfica d’esta tradición nel conceyu por parte de Xosé Antón Fernández, «Ambás», y Ramsés Ilesies. Los vecinos informaron de lo que s’alcordaben, de qué personaxes salíen na comparsa y de cómo diben vistíos y qué papel facíen. Depués de documentao too, los investigadores promovieron recuperar esta fiesta d’iviernu y, en collaboración colos vecinos, con integrantes del grupu de baille Xeitu y otres persones interesaes, volvieron sacar los aguilandeiros a les caleyes.

La comparsa de Villapañada ye grande. Salen el vieyu y la vieya, el médicu y el cura, l’osu y el domador, los maragatos, el Galán y la Madama, el diañu, la cenicera, l’afeitón, l’escobóny y los músicos. Y ye tamién una de les más cuidaes y mas prestoses de les que se faen n’Asturies. Depués d’andar armándoles, cantando y baillado, acaba delantre la ilesia y aguilandeiros y públicu lleven comida y faise un pinchéu. Tien munchísimu interés ver estes manifestaciones culturales asturianes nos pueblos, nos sitios onde nacieron porque ye onde garren razón de ser. Robar ropa d’un tendal y escondelo, tresnar coses d’un sitiu pa otru, armar la comedia, escapase l’osu al domador, ponese de partu la vieya y parir una pega, son expresiones de la diversión popular que nun tienen sentíu nuna ciudá, porque los urbanites nun les conocen y nun participen arriqueciéndola. Carreres del diañu escorriendo a grandes y a pequeños, puñaos de ceniza que-y cain a cualquiera enriba, bailles y dances. Y, sobre manera, l’agradecimientu de los vecinos que cumplimenten la visita de los aguilandeiros convidándolos y dándo-yos pa llevar lo que quieren y puen, como siempre se fixo: pan arroxao en forno de casa, embutíu, queisu, sidra…

Aguilandeiros de Villapañada. El diañu. | Foto: Tito Feijoo.
Aguilandeiros de Villapañada. El diañu. | Foto: Tito Feijoo.

El trabayu d’Ambás y compañía na recuperación de los Aguilandeiros de Villapañada nun quedó no explicao más p’arriba. También foi a toles escueles de Grau a enseñar a los nenos y nenas los personaxes y a da-yos fichines colos dibuxos de la comparsa pa pintar, nun trabayu de divulgación mui necesariu. Amás d’esto, Ambás, l’Archivu de la Tradición Oral d’Ambás y el grupu Xeitu producieron el documental Aguilandeiros de San Xuan. Recuperación d’una mazcarada nel conceyu Grau y fixeron una exposición colos traxes de los personaxes na Casa Cultura del conceyu.

El domingu 18 d’avientu, a partir de les 10.30 de la mañana, los aguilandeiros van volver salir per Villapañada y en tola cortorna va oise «las lluecas», las voces, la gaita y los glayíos de los dolores de partu. Una tradición revivía imprescindible pa conocer les fiestes d’iviernu asturianes.

Pa más información, pue consultase la páxina de Facebook Aguilandeiros de San Xuan de Villapañada.

Be the first to comment

Leave a Reply

Tu dirección de correo no será publicada.


*