Diseñu de ropa tradicional y pal sieglu 21

Constantino Menéndez | Foto: Ojos de hojalata.
Constantino Menéndez | Foto: Ojos de hojalata.

ALBERTO SUÁREZ
Constantino Menéndez González (Avilés, 1976) siempre tuvo interés por facer coses creatives. Dende neñu yá foi a aprender dibuxu y pintura con Favila. Tamién dende piquiñín gastó interés pola costura. Cola madre, que sabía corte y confección, aprendió a marcar patrones, afilvanar, coser… y tamién a usar la máquina de pedal. Yera una conxunción de fuercies y habilidaes perfecta pa él. La máquina permitía-y poner muncha atención nel procesu de costura de la que facía tol exerciciu qu’un críu inquietu necesita facer pa sentise bien. Esi críu, al que nun-y gustaba dir a escuela y que nun siguía les normes de la manada, de la mayoría, ensiguidá empezó a personalizar la ropa al aire d’él. Col pasu de los años estudió pa psicólogu pero nun dexó de la mano la costura y empezó a estudiar y a investigar la indumentaria tradicional asturiana y a facer reproducciones de ropa antiguo.

Como Constantino ye un creador inquietu, sintióse interesáu llueu por otres disciplines complementaries de la moda, como la fotografía, reflexonando nel poder de la imaxe, un aspectu que cuida munchísimo nos sos trabayos. Al acabar la carrera, empezó como monitor nun taller d’empléu con diez alumnes. L’intercambiu de conocimientos nun podo ser más positivu porque foi mutuu. Elles depredieron los secretos de la indumentaria tradicional y el so maestru aprendió técniques de confección industrial, sector onde trabayaren dalgunes. Nel 2001 sacó la FP de Moda y confección. Naquellos tiempos de los talleres llegaron a facer más de 30 traxes que yeren reproducciones de cuadros, grabaos y semeyes antigües onde s’espeyaba la manera de vistir de los asturianos dende’l sieglu XVII al XX. L’avance natural nesa etapa foi’l pasu a la confección d’indumentaria tradicional pa particulares, grupos de bailles y bandes de gaites.

Col pEtiqueta de made by kösasar del tiempu, la rama sanitaria –psicólogu– y la rama creativa –diseñador de moda, director artísticu y realizador– dan frutos ensin dase sombra. Menéndez pasó a ser director musical de l’Asociación de Música Tradicional Muyeres y participó na grabación de dellos de los discos. Con esti colectivu estrenó, nel 2010, l’espectáculu Inda suenen, obra onde foi director artísticu y musical y pa la que fixo parte del vestuariu. Nel 2013 llegó otra estrena, pero nel campu audiovisual, que foi la del curtiumetraxe Parcialmente despejado, una obra mui bien construida que tien como actriz protagonista a Olga Cuervo y que trata’l tema del impactu que fai nuna familia’l tener un fíu con trestornu d’espectru autista.

Obres audiovisuales d’otres temátiques y fines, como los videoclips, tamién salieron de les manes de Constantino Menéndez. Unes manes que nunca dexen de coser, igual que la so mente, onde cuese y descuese y vuelve coser munches prendes. Dalgunes feches pa la so marca, made by Kös, cola que crea ropa pa home y pa muyer compitiendo coles grandes cadenes de distribución de la única manera que se pue facer: ofreciendo creatividá y calidá. Coses, les dos, qu’hai que saber valorar y pagar porque, como él reconoz, «tol mundo nun ye quien a gastar ropa con un diseñu personalizao y a midida y quieren más vistir ropa fecho en serie». Pa la so firma de moda, Menéndez fai tamién los catálogos, los spots y les promociones, amás de diseñar, coser, empaquetar y unviar. Too cola garantía de les prendes artesanales, que dan personalidá y distinción. Les coses bien feches quieren tiempu. Hai munches idees lleldando pa la marca made by Kös esperando a dar col equipu adecuáu.

Constantino Menéndez | Foto: Ojos de hojalata.
Constantino Menéndez | Foto: Ojos de hojalata.

Constantino trabaya anguaño pa músicos asturianos de la talla de Marisa Valle Roso y Rodrigo Cuevas. Pa la primera tien fecho una prenda mui especial del so vestuariu y d’esa collaboración nació la escenografía del conciertu de fin de xira de Suena la mina nel teatru de La Llaboral, pa la que formó equipu coles actrices Ana Morán y Isabel Castelao, a les qu’axuntó l’espertu n’iluminación Xabi Alonso. Con Cuevas ta trabayando en forma pa la xira de conciertos del 2017, faciendo equipu cola tamién diseñadora de moda Susana de Dios. L’oxetivu ye difícil: sorprender al públicu y, a la vez, tar al altor d’esti artista que revolucionó’l panorama musical asturianu.

Costantino Menéndez piensa que «la indumentaria tradicional asturiana hai que conocelo, valoralo, respetalo y usalo» y diba ver mui bien que «se reinventara». Él lleva años trabayando neso, nel diseñu de prendes pa usu diariu, confeccionaes con materiales comunes na moda d’anguaño –como la tela pa texanos, el neoprenu o’l puntu– que conserven cortes o un aire nos detalles de la indumentaria tradicional del país. Menéndez opina qu’«igual que se faen Nueches en danza pa que la xente disfrute hoi de formes de divertise mui antigües, l’oxetivu ye facer ropa cómodo pa güei cola identidá d’antes». Nesti camín, el diseñador presentó va poco unos pantalones inspiraos nel corte tradicional del calzón pero llargos y mui axustaos.

Be the first to comment

Leave a Reply

Tu dirección de correo no será publicada.


*