Diseñu gráficu de calidá pa empreses d’otru mundu

L’estudiu madrileñu Tata&Friends acaba de facer una imaxe corporativa nueva pa l’Axencia Espacial Europea. La concepción tipográfica inclúi un segmentu d’un cohete espacial encastráu na mesma lletra «a». Una esfera y un éxágonu dividíos en franxes y reventaos de colores en gama dan fuercia y atractivu a los oxetos xeométricos.

Otros trabayos recién d’esti estudiu son la imaxe pa Medialab Prado, que ye un llaboratoriu ciudadanu de producción, investigación y difusión de proyectos culturales que naz pa esplorar les formes d’esperimentación y deprendimientu n’andecha que surden dende qu’hai redes dixitales p’acá. Esti proyectu depende del Ayuntamientu de Madrid.

Jaime Fernández y Mónika Mayr.
Jaime Fernández y Mónika Mayr.

Tata&Friends son Jaime Fernández y Mónika Mayr, asina como un equipu pequeñu d’amigos y collaboradores. Tán interesaos nel diseñu n’andecha que se mueve polo que llama l’atención, la contemplación, el pensamientu, el probar y l’enquivocase… Gústa-yos trabayar pa clientes y marques que quieren facer coses diferentes. Pa ellos, el trabayu tien que ser prestosu, honráu, bravu, inquietu y tien que llevar a compartir la sabiduría y l’oficiu. Tata&Friends lleva furrulando dende 2013 y faen dirección d’arte, creen nomes comerciales y de marques, faen logotipos y identidaes corporatives, consultoría de diseñu, impresión, compaxinación de llibros, diseñu web o esposiciones, ente otros trabayos.

Be the first to comment

Leave a Reply

Tu dirección de correo no será publicada.


*