Diseñu y obra gráfica na Europa de posguerra

Cristalería de Tapio Wirkkala.
Cristalería de Tapio Wirkkala.

Descubrir la rellación, tan cercana como pasada per alto, ente les obres de dos y tres dimensiones –quier dicise, ente la obra gráfica y los oxetos de diseñu– que se fixeron n’Europa nel periodu posterior a la II Guerra Mundial ye l’oxetivu de la esposición Modern design and graphics; objects and prints from post-war Europe (Diseñu modernu y obra gráfica; oxetos y impresiones de la Europa posbélica) que se pue ver nel British Museum, de Londres, dende’l 12 de payares y que va tar abierta hasta’l 22 de xineru del 2017.

El muséu británicu alquirió, hai poco, por una donación anónima, una colección grande de cristalería, cerámica, oxetos de metal y madera y cestería de toa Europa, la mayoría d’ello fecho depués d’acabada la II Guerra Mundial. Esta donación permitió a la institución articular la presentación d’oxetos y obra gráfico d’una manera nueva: los trabayos en papel ufren un fondu cásique teatral a los oxetos, nuna relación qu’enseña conexones ente entrambos los dos tipos de materiales que nun se vieren enantes.

La mayoría de les pieces de la esposición proceden d’Escandinavia y Italia, y munches vienen de la donación mentada, anque otres pertenecíen yá a los fondos del muséu. El contemplar estes obres xuntes fai ver cómo les mesmes preocupaciones calaron en campos de producción estremaos.

Nos países nórdicos, la influencia del paisaxe desenvolvió un papel fundamental, un paisaxe que tien muncho que ver colos ríos, llagos y montes xelaos del estremu norte d’Europa. Asina, trabayos como los del vidrieru finlandés Tapio Wirkkala, qu’asemeyen bloques de xelu derritíos, frañaos o esculpíos, preséntense enfrentaos a obra impreso onde se puen ver paisaxes xelaos dafechu.

Otru nome finlandés que ta presente na esposición ye’l del cesteru Markku Kosonen, qu’adaptó d’una manera maxistral les formes de los paxos y maniegues tradicionales pa facer obres d’arte modernes. Estos trabayos dialoguen, dientro de la esposición, coles bolses feches de corteyu de bidul que tovía güei son espresión de la cultura y la identidá nacionales, a pesar de la globalización.

Hai tamién obra gráfico y cristalería sueco col tema de la pesca, mentes que la representación de Dinamarca ta al cargu d’Erik Magnussen y les sos cuberteríes, que revolucionaron el diseñu domésticu na década de 1960, y les impresiones del pintor, poeta, director de cine y escultor Per Kirkeby.

La estaya italiana xunta obres abstractes d’Arnaldo Pomodoro y Enrico Castellan cola lloza y cristalería colorío de Dino Martens y Ercole Barovier. Na esposición tamién s’atopa un conxuntu más pequeñu de pieces d’otres partes d’Europa, como la obra Toaster (Tostadora), del artista británicu Richard Hamilton, y la propia tostadora representada na llámina, un diseñu clásicu de la compañía alemana Braun.

Be the first to comment

Leave a Reply

Tu dirección de correo no será publicada.


*