E, d’Enkore: soníu de madurez

El públicu asturianu tuvo la oportunidá de conocer a los vascos Enkore nel festival Liet International que se celebró nel teatru de la Llaboral n’avientu del 2012. D’aquella, el grupu acababa de presentar el so primer discu, Faktore Komunak, un trabayu marcáu por soníos propios del hardcore melódicu, onde la guitarra y el baxu teníen munchu protagonismu pero con ritmos qu’animaben a baillar y, sobre too, mui frescos.

Aquel grupu de cuatro rapazos más salaos que les pesetes rubies nun quedó namás que nuna promesa, sinón que, a fuercia de trabayu, fueron faciéndose un sitiu na escena musical n’euskera y convirtiéndose, nos años siguientes, nun nome avezáu nos carteles de sales y festivales del País Vascu y Navarra. Nel 2014 llegó’l so segundu discu, Kanala, y, a finales del 2015 publicaron el terceru, E, que foi’l de la so confirmación como una banda totalmente asentada y que, de xuru, va dar muncho que falar nos próximos años nel conxuntu del panorama estatal.

Dende qu’arrancó 2016 cásique nun pararon de dar conciertos dientro de la xira de presentación del so tercer trabayu: Arrasate, Donosti, Azkoitia o Beasain en Guipúzcoa; Bilbo, Ortuella, Berango o Ugao en Vizcaya, o Altsasu, Arantza o Viana, en Navarra, fueron delles de les poblaciones que vieron actuar en directu al grupu que formen Xabi Hoo (voz), Urtzi Iza (guitarra), Aitor Gallastegui (baxu) y Alvaro Olaetxea (batería).

E, en palabres de Xabi Hoo, compositor y líder del grupu, ye «un discu rock que se pue baillar», una afirmación totalmente cierta, pero non solo. Ye un discu pa sentir tamién en casa, pa disfrutalu y nun posar la sonrisa de la cara mentes suenen los sos cantares de tonos optimistes y cargaos d’enerxía. Y sí, va ser imposible tener quietos los pies y la cabeza porque Xabi tien tola razón del mundu: ye un discu pa baillar.

Estilísticamente, esti trabayu dexa les siendes del harcore peles qu’empezaron y métese pelos caminos del pop-rock, la electrónica baillable («Zerua») y hasta s’atreve a esperimentar con soníos africanos nel cantar «Nomada». Si, como diz Xabi Hoo, el tercer discu d’un grupu «ye la confirmación del so soníu y el puntu de partida pa lo venidero», los próximos pasos de los Enkore van ser dignos de siguir de cerca.

Los cantares d’E, igual que los de los discos anteriores, tán disponibles pa sintilos online nel espaciu qu’Enkore tien na plataforma musical Bandcamp.

Be the first to comment

Leave a Reply

Tu dirección de correo no será publicada.


*