Echa a andar el I Festival Nel Amaro de teatru profesional

Carlos Alba na obra 'Llázaro de Tormes'. Fotografía: RenéFotógrafo
Carlos Alba na obra 'Llázaro de Tormes'. Fotografía: RenéFotógrafo

El vienres 3 de payares, cola representación de la obra Nunca nun se sabe,, de la compañía Higiénico Papel Teatro, va arrancar la primer edición del Festival Nel Amaro de teatru profesional en llingua asturiana y gallego-asturianu. Esti festival naz asociáu al Premiu Nel Amaro de teatru profesional, que convoca la Conseyería d’Educación y Cultura del Gobiernu d’Asturies col envís de visibilizar y normalizar les llingües propies del país nel ámbitu profesional del arte dramáticu.

El programa del festival –que se va desenvolver los cuatro vienres de payares, a les 20:00 hores, nel Teatru Filarmónica d’Uviéu– compónenlu les cuatro obres finalistes d’ente toles que se presentaron anguaño al premiu. El calendariu de representaciones empieza, como yá s’adelantó, el 3 de payares, con Nunca nun se sabe, de la compañía Higiénico Papel Teatro, y sigue con Llázaro de Tormes, de Carlos Alba (10 de payares); Planeta Joselín, d’Escenapache (17 de payares), y Los amorinos de Bastián y Bastiana, de Producciones Nun Tris (24 de payares).

Al Premiu Nel Amaro de teatru profesional pudieron presentase obres de compañíes profesionales que yá s’estrenaren n’asturianu o gallego-asturianu, tanto orixinales como versiones o adaptaciones de títulos n’otres llingües. Un xuráu formáu por espertos en teatru y llingua asturiana escoyó d’ente los proyectos presentaos los cuatro finalistes, que son los que se van representar nel primer Festival Nel Amaro de teatru profesional en llingua asturiana, entamáu cola ayuda del Conceyu d’Uviéu. Depués de les actuaciones del Festival, el xuráu va decidir cuála ye la compañía o’l grupu teatral ganador, que va recibir como gallardón una pieza artística, amás del compromisu del Gobiernu del Principáu d’Asturies de velar pola promoción y difusión del espectáculu nos medios de comunicación y nos eventos qu’entame’l mesmu Gobiernu.

Tanto’l premiu como’l festival lleven el nome de Nel Amaro, l’autor turonés que falta dende’l 2011 y qu’a últimos de la década de los setenta del sieglu pasáu abrió’l camín pa la vanguardia teatral n’asturianu. Ente les sos obres de teatru destaquen Xénesis o alborá de la concencia (1978), Glayíos nueos, vieya murnia (1979), L’únicu rebalbu (1980) o Antígona,, col que ganó’l premiu de teatru de l’Academia de la Llingua Asturiana en 1991. Les manes en caxón (2003) foi la so última publicación teatral.

Be the first to comment

Leave a Reply

Tu dirección de correo no será publicada.


*