‘El Cartógrafo’, con Blanca Portillo y José Luis García Pérez, llega al Niemeyer

José Luis García Pérez y Blanca Portillo nuna representación de ‘El Cartógrafo’.
José Luis García Pérez y Blanca Portillo nuna representación de ‘El Cartógrafo’.

El cartógrafo, Varsovia 1:400.000 ye una obra con testu y dirección de Juan Mayorga (Madrid, 1965) que va representase nel Centru Niemeyer d’Avilés el vienres día 1 d’avientu a les ocho y media la tarde. El subtítulu fai referencia a los cuatrocientos mil xudíos a los que los nazis acotaron nun espaciu pequeñísimu na ciudá polaca ente los meses d’ochobre y payares de 1940. La trama empieza en Varsovia anguaño. Blanca oi la lleenda del cartógrafu del guetu, que rellata la historia d’un cartógrafu vieyu que s’empeñó, –mientres too diba acabando a la vera d’él–, en dibuxar un mapa d’aquel mundu amenazáu. Como les piernes yá nun-y valen p’afitase y nun podía dir a anotar los datos que necesitaba, enfótase nuna neña que sal a buscalos pa él. Blanca va dar por buena la lleenda y va a tirase tamién a buscar esi mapa vieyu pela ciudá. De la que busca lo que yá nun ta, acaba buscándose ella.

El cartógrafo ye una obra sobre la memoria y contra la dictadura del olvidu que manda na sociedá anguaño, un testu que trata l’enguedeyu que se da ente lo que ye escaecer y lo que ye recordar. Por eso la clave ta nel mapa, un instrumentu onde figura lo que nun se pue olvidar. Una trescripción en datos d’un de los momentos más aberrantes del sieglu xx. La escenografía ye un espaciu únicu y con un vestuariu únicu. Llevántase namás con dellos elementos: nuna caxa negra, unes rayes blanques pintaes en suelu –los llinderos–, unos asientos colloraos y unos personaxes que tamién visten d’encarnao. Esti efectu, con una acotación tan pequeña, trespasa pal espectador la necesidá d’imaxinar l’espaciu narrativu, porque pa Mayorga (premiu Nacional Español de Teatru del 2007) «el teatru ye’l sitiu onde aconceyamos pa imaxinar xuntos, y caún a la manera d’él».

Mayorga ye doctor en Filosofía y ta llicenciáu en Matemátiques. La so creación en testos teatrales ye mui numberosa y obres d’él tan traducíes a venti idiomes de tol mundu y pudieron vese a nivel internacional. Tamién ye mui prolíficu adaptando testos del teatru clásicu español, alemán y rusu.

La obra que va representase n’Avilés estrenóse en payares de 2016 –polo que lleva tol añu de xira–, dura dos hores y n’ella Blanca Portillo da vida a tres personaxes y José Luis García Pérez a nueve, nun dir y venir nel tiempu dende l’añu 2016 al 1940.

Be the first to comment

Leave a Reply

Tu dirección de correo no será publicada.


*