El Chicago Athenaeum premia l’ampliación del Belles Artes

Museo bbaa ampliacion. Foto: Suárez.

L’estudiu Mangado&Asociados,del arquitectu navarru Francisco Mangado, recibió’l Premiu Internacional «Chicago Athenaeum» 2016 pol proyectu d’ampliación del Muséu de Belles Artes d’Asturies. Dende 2004, el Chicago Athenaeum, xunto col European Center for Architecture Art Design and Urban Studies and Metropolitan Arts Press, vienen organizando estos Premios Internacionales d’Arquitectura como una manera de reconocer los meyores proyectos internacionales tanto n’edificación nuevo como en paisaxismu o planificación urbanística.

El xuráu, formáu por arquitectos y críticos d’arquitectura, evaluó, ente otres característiques, el diseñu y la innovación, la sostenibilidá, la creatividá, la marca, el diseñu responsable ecolóxicamente, los materiales, la tecnoloxía, les artes gráfiques o l’embalaxe. Al respective del muséu asturianu, l’equipu técnicu destacó qu’«el proyectu contempla llevantar un edificiu nuevu del too dientro del complexu urbanu, lo que se traduz en que la secuencia de les fachaes existentes alredor túvose como una condición contextual, de manera tala qu’estes fachaes asumen el papel d’un “telón de fondu” urbanu incuestionable».

Museo bbaa ampliacion. Foto: Suárez.
Lluz entrando per una claraboya nel Muséu de Belles Artes. Foto: Suárez.

L’informe sorraya la unión ente los edificios que formen el muséu al traviés de pasareles acristalaes lluminoses, al mesmu tiempu que llogra facer del patiu un sitiu d’alcuentru. Otru aspectu que se fai destacar ye’l tratamientu de la lluz, del que diz: «Ye siempre importante na arquitectura, pero más tovía nun muséu –naturalmente, nun nos referimos a la illuminación artificial, que, por descontao, constitúi un proyectu en sí mesmu, sinon a la lluz natural—. Lo ideal ye que la presencia de la lluz natural sía sutil, dalgo que’l proyectu trató de trabayar hacia esti ideal pente medies de la lóxica de los güecos y les claraboyes, qu’afecten directamente a les plantes superiores». En cuantes a la fachada de vidru nueva —quiciás l’elementu más llamativu de l’ampliación— señalen que «produz un xuegu d’espeyos cruciaos nel interior; una interacción ente dos fachaes que crea un espaciu d’intensidá rica».

El proyectu de Mangado pa la ciudá d’Uviéu comparte esti gallardón con proyectos asitiaos en 43 países, ente los que s’atopen Angola, Arxentina, Australia, Austria, Canadá, China, Colombia, República Checa, Dinamarca, Finlandia, Francia, Alemaña, Hong Kong, India, Irán, Irlanda, Israel, Italia, Xapón, Xordania, Arabia Saudí, Letonia, Líbano, Malta, Malasia, México, Marruecos, Países Baxos, Nueva Zelanda, Noruega, Singapur, Rusia, Serbia, Eslovenia, España, Corea del Sur, Suecia, Suiza, Tailandia, Turquía, Vietnam, Estaos Uníos y Reinu Uníu.

Tolos proyectos premiaos van poder vese n’Estambul, Turquía, hasta’l 30 de setiembre de 2016 dientro de la esposición The City and the World (La ciudá y el mundu). La muestra va rotar per dellos países europeos, empezando per Grecia, a lo llargo del 2017.

Be the first to comment

Leave a Reply

Tu dirección de correo no será publicada.


*