El curtiu ‘Madre’, de Rodrigo Sorogoyen, gana’l festival Cinesán

Fotograma del curtiu ‘Madre’, de Rodrigo Sorogoyen.
Fotograma del curtiu ‘Madre’, de Rodrigo Sorogoyen.

El curtiumetraxe Madre, del director Rodrigo Sorogoyen (Madrid, 1981) ye’l ganador del Festival Internacional de Curtiumetraxes de Samartín del Rei Aurelio (Cinesán). La pieza, de 15 minutos de duración, presentóse nel mes de marzu nel festival de Medina del Campo y, nestos meses, algamó yá más de 15 premios, ente ellos el del Festival Internacional de Cine Independiente d’Elche o’l Festival de Cine d’Arnedo (La Rioxa).

La cinta arranca cola llamada d’un neñu a so madre. El rapacín, que ta de vacaciones col padre nel País Vascu francés, cuénta-y a la madre que nun atopa al padre y que ta solu na playa. Empieza, entós, un trhiller psicolóxicu onde, alredor de l’angustia de la protagonista pola situación del fíu, desenvuélvense una serie de temes que cualquier espectador pue asumir como propios, como les rellaciones materno-filiales, la herencia de la culpa o’l mieu a lo desconocío. L’actriz Marta Nieto (Murcia, 1981), tamién llevó’l premiu del xuráu a la meyor interpretación.

El director, Rodrigo Sorogoyen, ye llicenciáu n’Historia y estudió guion na ECAM, lo que-y valió pa trabayar, dende mui mozu, como guionista en series de televisión. Nel 2011 creó, con otros tres socios, la productora Caballo Films, cola que grabó los llargumetraxes Stockholm (2013) y Que Dios nos Perdone (2016), que merecieron dellos gallardones y nominaciones nos festivales más importantes del Estáu, como’l de Málaga o’l de San Sebastián.

El premiu a la meyor cinta de la sección asturiana fue pal curtiu Llegar, con guión y dirección de K. Prada y J. Prada, y el trabayu como intérpretes de Raquel Pérez y Violeta Orgaz, que llevó’l premiu a la meyor actriz por esti papel nel XV Jameson Notodofilmfest. La cinta condensa, en tres minutos y mediu, la congoxa y la medrana d’una madre énte la posibilidá de perder a la fía por culpa de la falta d’ingresos económicos.

Nesta ocasión, presentáronse al Festival Internacional de Curtiumetraxes Cinesán un total de 1.179 películes, procedentes de más de 30 países, ente los que s’atopen Francia, Alemaña, México, Colombia, Irán o India. El xuráu d’esta edición compunxéronlu’l productor de cine Jaime Gona, el cineasta Asur Fuente, el director Fran Longoria y la profesora de la Universidá d’Uviéu Emma González, amás de la conceyala de Cultura de Samartín, María Alonso García, como presidenta, y el técnicu de cultura José Ramón Martín Ardines, como secretariu. La gala de clausura y entrega de los premios del festival va facese la tarde del 11 de payares, fiesta de San Martín, nel Teatru Municipal de L’Entregu.

Be the first to comment

Leave a Reply

Tu dirección de correo no será publicada.


*