El ‘Libru del rei d’armes’: la xoya de los armoriales portugueses

Detalle de la ilustración de Carlomagno nel 'Llibru del Rei d'Armes'.
Detalle de la ilustración de Carlomagno nel 'Llibru del Rei d'Armes'.

El Livro do Armeiro-Mor (Llibru del Rei d’Armes), conocíu tamién como Livro Grande (Llibru Grande), ye un manuscritu ilumináu fecháu en 1509 qu’inclúi una colección enorme d’escudos heráldicos. El códice acabóse en tiempos del rei Manuel I, anque foi, según dellos estudios, un encargu del so predecesor, Xuan II, al francés Jean du Cros, rei d’armes de Portugal al tiempu d’acabase’l llibru.

El códice empieza, precisamente, con una páxina de títulu onde figura l’escudu d’esti rei d’armes –que yera la máxima autoridá del estáu en materia de rexistru de blasones, na composición d’escudos nuevos y na guarda de les lleis heráldiques– y sigue con un índiz onde se numeren los escudos recoyíos y los personaxes a los que representen. El volume dedica’l primer capítulu a los Nove da Fama, nueve xefes históricos o lexendarios (tres hebreos, tres paganos y tres cristianos) que se consideraben, na dómina, modelu pa los monarques europeos: Xosué, David, Xudes Macabéu, Alexandru Magnu, Héctor de Troya, Xulio César, el rei Arturo, Carlomagno y Godofredo de Bouillón. A estos nueve, Du Cros va axunta a Bertrand du Guesclin, condestable de Francia cuando la Guerra de los Cien Años –seique por aquello de facer patria–.

Los capítulos siguientes tán dedicaos a los reis de dellos reinos tanto verdaderos como de lleenda, nobles y eclesiásticos importantes d’Europa –organizaos en dos series, la de la elección del emperador d’Alemaña y la de la unción del rei de Francia– y, al final, el repertoriu d’escudos d’armes de la nobleza portuguesa del momentu. Tolos escudos se presenten adornaos con cimeres y cintes, y los personaxes, vistíos a la moda de la época, caún colos atributos propios de la so categoría. Cásique tolos escudos lleven una banda al pie col nome del so portador, en munchos casos, cola grafía orixinal alteriada p’adaptala al portugués del sieglu XV.

Esti códice, que se conserva anguaño en Lisboa, nel Archivu Nacional Torre do Tombo, ta consideráu una de les obres maestres de la iluminación portuguesa medieval, a l’altura d’exemplos como l’Apocalipsis de Lorvão (sieglu XII), el Llibru d’Hores de D. Duarte (primeros del sieglu XV) o los contemporáneos Llibru d’Hores de D. Manuel y Biblia de los Xerónimos. Amás, ye l’armorial portugués más antiguu que llegó a los nuestros díes y nél puen vese, por exemplu, les armes de families d’orixe asturianu, como los Henriques (escrito nel llibru como Casa danriquez, ensin apóstrofu y con «a»), qu’asentaron en Portugal.

Be the first to comment

Leave a Reply

Tu dirección de correo no será publicada.


*