El ‘Llázaro de Tormes’ de Carlos Alba gana’l I Premiu Nel Amaro de teatru profesional

Carlos Alba como Llázaro de Tormes. Fotografía: RenéFotógrafo.
Carlos Alba como Llázaro de Tormes. Fotografía: RenéFotógrafo.

Carlos Alba estrena, col montaxe Llázaro de Tormes, la nómina de vencedores del Premiu Nel Amaro que convoca’l Gobiernu d’Asturies pa compañíes profesionales de teatru n’asturianu y gallego-asturianu. El xuráu decidió conceder esti gallardón por unanimidá a esta adaptación de la novela castellana del sieglu XVI La vida de Lazarillo de Tormes y de sus fortunas y adversidades pol «grann procuru llingüísticu tanto nel testu como na representación del espectáculu, entroncando con un xéneru tradicional asturianu como ye’l monólogu y dignificándolu», según reza nel acta.

Pa poder fallar el premiu, los miembros del xuráu asistieron, a lo llargo del mes de payares, a les representaciones de les cuatro obres finalistes que se fixeron nel Teatru Filarmónica d’Uviéu dientro del I Festival Nel Amaro de Teatru profesional n’asturianu y gallego-asturianu. Amás de Llázaro de Tormes, el públicu tuvo la oportunidá de ver los espectáculos Nunca nun se sabe, d’Higiénico Papel Teatro; Planeta Joselín, d’Escenapache, y Los amorinos de Bastián y Bastiana, de Producciones Nun Tris, toos ellos finalistes d’esta primer convocatoria del premiu.

Anguaño, el xuráu formáronlu’l director xeneral de Planificación Llingüística y Normalización, Fernando Padilla Palicio –como presidente–; Eva Vallines Menéndez, actriz y crítica teatral; Esther Castro Manzano, responsable del Serviciu de Normalización Llingüística de Siero; Cristina Muñiz Martín, escritora; José Ramón Iglesias Cueva, secretariu de l’Academia de la Llingua Asturiana, y Roberto Corte Martínez, director y críticu teatral. Nel acta, toos ellos calificaron como «rellumante» l’adaptación que fixo Carlos Alba d’un clásicu de la lliteratura universal a la cultura asturiana.

Carlos Alba, que demostró na representación del Llázaro de Tormes la so categoría como intérprete, tien una trayectoria mui amplia nel campu de los cuentacuentos y el monologuismu –el so alcuñu, Cellero, ye’l nome d’ún de los sos personaxes más conocíos–. Los sos espectáculos tienen como destinatarios a públicos estremaos, anque predominen los montaxes pa l’audiencia infantil y xuvenil, un colectivu ente’l que ye ún de los actores asturianos de más sonadía.

Igual que’l Premiu al Meyor Cantar y al contrariu que los otros premios lliterarios del Gobiernu d’Asturies, el Nel Amaro nun cuenta con dotación económica directa, sinón que’l ganador recibe una obra orixinal d’un artista plásticu asturianu y la promoción del montaxe nos actos qu’organice’l propiu Gobiernu. A esti galladón pueden presentase empreses del sector profesional que se dediquen a la producción y representación d’espectáculos teatrales, con obres orixinales o con adaptaciones d’espectáculos que se representaren primero n’otra llingua.

Carlos Alba fai de ‘Llázaro de Tormes’ un clásicu asturianu (crítica d’Henrique G. Facuriella).

Be the first to comment

Leave a Reply

Tu dirección de correo no será publicada.


*