El Nalón: la voz del ríu

HENRIQUE FACURIELLA
Pa la xente que nacimos nel Valle del Nalón, el ríu ye muncho más qu’un accidente xeográficu, ye cásique un vecín más, un vecín vieyu al que, nel día a día, nun se-y fai gran casu, pero ensin el que nun díbemos saber vivir. Esto agora, que ta canalizáu; sicasí, en tiempos non tan lloñe de los nuestros, pal Nalón mirábase entornao, porque nunca sabíen cuándo diba llegar una llena que llevara pontes y cases y hasta les ilesies. Por eso, hasta cuasi’l sieglu XX, la mayoría de les cases facíense a media altura’l monte y dexábense les vegues, al llau del ríu, pa tierres de llabor, de manera qu’aprovecharen los efectos fertilizadores del ríu.

El Nalón, como munchos otros ríos, tien tamién un calter cuasi míticu, ye tovía un genius loci, un dios del llugar, ún de los últimos que queden nesti tiempu de descreimientu. Ye, amás, una divinidá ecléctica, una entidá que, a los sos oríxenes nutricios –nun me cuesta pensar nos clanes de cazadores del Paleolíticu averándose al ríu pa pescar–, foi amestando les esperances y los mieos de les xeneraciones que se sucedieron nel poblamientu del valle.

Ente estos estratos míticos, ún de los más recientes –y tovía bien vivu nel imaxinariu colectivu– ye’l del calter mineru y industrial. Dicir Nalón ye, sobre manera, dicir carbón, dicir pozos y bocamines, escombreres y nates y negrura. Y, ente tolos cantares que falen del ríu, seique’l primeru que llega a la mente ye’l «Nalón» de Nuberu y el so estribillu: «Nalón, Nalón carboneru, / Nalón, mira cómo baxes, / mientres antes dabes vida, / agora, de negru, mates». Hai tiempu yá que nun baxa l’agua puerco d’hulla, sicasí, el trabayu na mina y la llucha obrera sigue teniendo nel ríu un altar au dirixir les plegaries.

Eugenia Tejón y Ángel González | Foto: Mind Revolution
Eugenia Tejón y Ángel González | Foto: Mind Revolution

Anguaño, el grupu Mind Revolution –que formen Eugenia Tejón y Ángel González– propón una vuelta nueva al tema del ríu como corriente que vertebra un territoriu, una vuelta materializada nel trabayu discográficu El Nalón, qu’edita La Escucha Atenta. Ye’l ríu concentráu en dalgo más de 40 minutos de soníu, dende les fontes n’El Puertu (Tarna) hasta San Esteban, onde’l Nalón se vuelve ría y se vierte nel Cantábricu.

A lo llargo d’esos 40 minutos, el ríu fala con voz propia –una voz que Tejón y González recueyen con procuru, con hidrófonos y micrófonos de contactu– y tamién coles voces de lo que tien alrededor: los tordos, les centrales hidráuliques del cursu altu, les espiches, los molinos –col so ritmu constante, enerxizante–, la industria, les campanes… Hasta les persones falen cola voz del ríu, como cuando Manuel y Ana y narren la construcción del banzáu de Tañes y cómo l’agua cubrió les cases onde pasaben los branos, o como cuando Higinio y Tino recuerden la llena de 1938, que llevó la ponte La Chalana. El ruxerrux del ríu mécese col chisporrotiar del carbón na cocina de Rosa y Dori, pero tamién coles foles de la playa de Garrunchu, en Muros, y colos cantos n’honor de la Virxe del Carme en San Esteban.

El motor qu’impulsó a Mind Revolution a embarcase nesti trabayu hay que dir a buscalu a los nacionalismos musicales de los sieglos XIX y XX, especialmente a la obra de Bedrich Smetana Má Vlast (El mio país), onde s’atopa’l poema sinfónicu «El Moldava». Onde Smetana echa mano de los instrumentos musicales, Eugenia Tejón y Ángel González recurren a la tecnoloxía fonográfica actual pa llograr el mesmu oxetivu: espresar la identidá sonora d’un país, d’un territoriu.

El trabayu pue alquirise por 15 euros al traviés de la páxina web de la discográfica y inclúi un CD, un llibretu cola guía d’audición y una fotografía firmada de l’artista Emma Bi en papel d’algodón. Sicasí, tamién se pue descargar namás la grabación, en calidá mui alta, por 5 euros dende la mesma páxina web.

Be the first to comment

Leave a Reply

Tu dirección de correo no será publicada.


*