El planeta Joselín nel sistema solar Tocote

Alberto Rodríguez (esq.) y Javi Castro (der.) en ’Planeta Joselín’.
Alberto Rodríguez (esq.) y Javi Castro (der.) en ’Planeta Joselín’.

HENRIQUE G. FACURIELLA
El vienres 17 d’ochobre, la compañía Escenapache representó, nel Teatru Filarmónica, la obra Planeta Joselín, el tercer títulu del Festival Nel Amaro de Teatru Profesional n’asturianu y gallego asturianu qu’organiza la Conseyería d’Educación y Cultura. El sitiu y la fecha nun son datos baleros si se tien en cuenta que’l patiu de butaques taba enllenu y que la obra yá se montara nel mesmu escenariu hai menos d’un mes (el 27 d’ochobre). Ello ye indicativo –paezme– de que l’espectáculu gustara y que munchu públicu de la primer función recomendara a xente conocío que fuera a velu nesta segunda oportunidá. Otru factor qu’esplica esti éxitu de convocatoria ye la presencia, ente los actores, d’Alberto Rodríguez, una de les cares más conocíes de la TPA (Terapia de Grupo, Superasturian@s, De Folixa en Folixa…).

En Planeta Joselín, Rodríguez tien de compañeros de repartu a los actores Javi Castro y Jorge Moreno, dos intérpretes que yá compartieren cartel l’añu pasáu na comedia Tribulaciones del diestro Jorge Moreno ‘Morenito’ luego de aceptar un clavel desde el tendido nueve por una supuesta desconocida. Esta vez, los tres actores repártense los ocho personaxes de la obra nun intercambiu d’identidaes tan sorprendente como bien executáu.

Na primer escena dase a conocer al tríu central de la obra: Enedina, la madre (Jorge Moreno); Claudio, el padre (Alberto Rodríguez), y Joselín, el fíu (Javi Castro). Nesta primer toma de contactu enséñense tamién los recursos que van marcar la construcción de situaciones y personaxes y, sobre manera, los gags cómicos: la esaxeración de rasgos de carácter tópicos, l’humor escatolóxicu, la bayura de palabres malsonantes y una puesta n’escena qu’asonsaña al cabaré –o a los dibuxos animaos– en delles partes. Too xunto nes manes de Moreno, Rodríguez y Castro baxo la dirección de Marga Llano dan nun espectáculu pa partise de risa –y pa muncho más–.

De tolos elementos que componen esta traxicomedia –thriller asturianu lo llama la compañía–,  paga la pena aparar na caracterización de personaxes, pos ye ún de los pegoyos de la historia y lo que más inflúi nel reconocimientu del públicu en tolo que se cuenta. Asina, Enedina ye una madre sobreprotectora y obsesionada cola llimpieza y les enfermedaes –«¿Quies una aspirinina, fíu?»– que tolo repite dos veces –o tres, como la ruta’l Cares–; Claudio, un prexubiláu más planu –aparentemente– qu’una plancha aceru, y Joselín, un guaḥe de dieciocho años que, aparte de trabayar y estudiar na escuela tayer, nun tien más esmolición na vida que ver cómo estrenase cola moza y que vive, como diz so padre, nel ‘planeta Joselín’.

El Joselín forma parte d’un sistema planetariu que podemos llamar ‘Tocote’ y que, anque se pue identificar cola barriada uviedina conocida con esi nome, el términu abarca otros barrios obreros d’Asturies, tean en Mieres, en Ciañu o en Contrueces. Les colomines tresfórmense, asina, nun topos lliterariu que pueblen personaxes como’l colega ex-yonki, el que ye un poco a la buena, la cuñada ‘muda’ o’l chulín que marchara hai años pa Madrid y vuelve con aires d’enteráu. Son toos ellos personaxes que funcionen porque son reconocibles y, amás de pol so llingüaxe vulgar y políticamente incorrectu –mui incorrectu–, incomoden porque espeyen una parte de la nuestra sociedá que ta más cercana a nós de lo qu’a la mayoría nos presta almitir.

Nesti sen, anque’l pesu de la obra paez que cai nel llombu d’Enedina –que, amás, ye la bisagra ente les dos trames que se desenvuelven na comedia–, hai que destacar la importancia d’otros dos personaxes, de los que, nun principiu, nun s’espera’l xuegu que puen dar: son la pareya d’hermanos que formen Claudio y Jovita, a los qu’encarna’l mesmu actor, Alberto Rodríguez. De mano, paez qu’él tien la mesma sensibilidá qu’un tochu maera, sicasí, ye’l personaxe qu’ufre una complexidá de sentimientos mayor –namás qu’hai que pensar en cómo s’emociona al recordar l’himnu del equipu col que xugó al fúbol de mozu– y, al mesmu tiempu, aplica a la vida una filosofía fecha de pragmatismu y ciñu polos d’él que lu eleva a la categoría de paisanu. La so hermana Jovita ye entrañable na so maldá aparentemente inxenua –«Yo nun pregunto nada, a mi lo que me cuenten…»– y ufre, nel diálogu que tien al principiu cola so cuñada Enedina, dellos de los momentos de mayor risión, amás de desvelase como un personaxe clave na resolución del enriedu.

La obra, sicasí, nun ye redonda. Empezando pel asturianu del que se manden los actores, tremáu d’usos castellanos –sobre manera nel casu de Javi Castro y, dalgo menos, de Jorge Moreno– que, anque pudiera xustificase por una cercanía mayor a la fala real de la xente que val de modelu pa los personaxes qu’interpreten, espeya más bien una falta de soltura nel usu del idioma. En cuantes al ritmu, anque se lleven mui bien los cuasi cien minutos que dura la obra –gracies, sobre manera, a los golpes d’humor–, vense, dacuando, dellos momentos güecos nel desenvolvimientu de les trames, sobre too, según s’averen al final. Con too y con ello, nun son fallos insalvables, tolo contrario; quiciás respuendan a una falta de rodaxe de la pieza y, con más compenetración de los actores –y un poco de procuru llingüísticu–, ye una comedia costumista y contemporánea al mesmu tiempu destinada a trunfar en cualquier plaza que se presente.

Planeta Joselín
Escenapache
Teatru Filarmónica, Uviéu
17 de payares del 2017

Dirección: Marga Llano.
Testos: Marga Llano.
Illuminación: Rubén Rayán.
Diseñu de vestuariu: Azucena Rico.
Elencu: Alberto Rodríguez, Javi Castro y Jorge Moreno.

Be the first to comment

Leave a Reply

Tu dirección de correo no será publicada.


*