Embaixada, centru comercial con alma

En Lisboa ta ún de los centros comerciales convencionales más grandes d’Europa: Colombo; y ún de los más delicaos y únicu: Embaixada. Dientro de la grandísima ufierta de belleza y refinamientu que tien Lisboa, nel mesmu corazón del barriu Príncipe Real, asomando la fachada blanquísima al mesmu parque, ta Embaixada, un conceptu de tiendes diferentes.

Na última década, l’Avenida Príncipe Real pasó de tener cases coles fachaes abandonaes, tasques mui vieyes y dellos anticuarios, a tener fachaes impecables y tiendes de moda y arte enllenes de presonalidá y productos guapos y esclusivos. Lloñe de les tiendes de les grandes firmes de l’Avenida da Liberdade, y de les cadenes de diseñu y venta de ropa qu’unifiquen toles ciudaes europees, Lisboa saca pechu elegante, moza y hipster pa dexar claro por qué ye una de les ciudaes más interesantes del mundu. Detrás d’Embaixada ta un inversor d’orixe austriacu nacíu nel Brasil: Anthony Lanier.

embaixada_01Hasta hai unos años, el Palácio Ribeiro da Cunha taba ciarráu a cal y cantu, coles sos paredes color teya gastaes teniendo por una colección de cúpules d’estilu neoárabe que yera difícil dexar de mirar. Edificáu en 1887 por una familia que fixo la fortuna nel Brasil, nel 2013 abríó como un espaciu comercial mestu. Les tiendes ocupen el portal y cada una de les quince habitaciones de les dos plantes, comunicaes toes ente elles y col corredor del patiu central. Na parte de baxo hai un restaurán y una terraza que da pal xardín priváu que llinda col Botánicu de la capital portuguesa.

Dellos cuartos tan rehabilitaos, otros conserven los desconchaos de les paredes, pero, en cualquier casu, les escayoles, los techos altos y el refinamientu palaciegu tan per auquiera. Si l’edificiu ye únicu, la mayor parte de les mercancíes que tán a la venta tamién son. Ropa, calzao, cacía, perfumes, xoyes y moblame fecho a mano d’una calidá superior. Too diseñao y fecho en Portugal.

Be the first to comment

Leave a Reply

Tu dirección de correo no será publicada.


*