En ca’l Gaiteiru: Pedro y Diego Pangua

En Ca’l Gaiteiru ye un llibru-cedé, editáu por Tierra, que recueye música tradicional asturiana inédita hasta la fecha pa gaita y tambor. El cedé tien 21 pistes grabaes con instrumentos vieyos de delles partes d’Asturies –pa lo que se respeta la manera de tocar de les fontes orixinales de tresmisión– y el llibru divulga 82 partitures que repasen la trayectoria musical de Pedro y Diego Pangua y, de pasu, la variedá de repertorios pa gaita qu’hai per tol país. El repertoriu que recueye la publicación aportó-yos per delles víes: deprendíu de los gaiteros vieyos, sacáu de grabaciones de trabayu de campu de folcloristes o conocíu en sesiones de gaita y tambor con otros colegues.

En Ca’l Gaiteiru ye’l primer llibru de los Pangua y ye un pasu natural nes sos carreres como intérpretes y maestros. Pedro Pangua lleva yá cuatro décades tocando’l tambor asturianu pero, amás, dedicóse tola vida a la recuperación, estudiu y divulgación de la música tradicional asturiana, faciendo un papel importantísimu de ponte ente los músicos vieyos, depositarios d’una tradición musical de tresmisión oral, y los músicos nuevos, les más de les veces salíos d’un mediu urbanu, nun momentu de la historia cuando la gaita asturiana taba desprestixada y cayida nel escaezu por cuenta de los cambios sociales. Pedro Pangua, xunto con otros músicos de la so xeneración, fueron quién a llograr el milagru de que n’Asturies, agora, haya miles de gaiteros.

Cola publicación d’esti llibru, los autores quieren consiguir, polo menos, dos oxetivos. El primeru d’ellos, «que fuere aprovecháu por tolos gaiteros asturianos p’ampliar el so repertoriu. Ye innegable que n’Asturies actúa una fuerza centrípeta que lleva a cuasi tolos intérpretes a centrase nun garrapiellu de pieces consideraes como centrales, básiques y, en dellos casos, normatives. Pero hai muncho más, muncha música por descubrir. L’otru oxetivu ye promocionar la diversidá interpretativa y organolóxica de la gaita asturiana. Nun ye cuestión namás d’incluir nel repertoriu gaitísticu más pieces: ye importante rescatar y valorar la diversidá qu’había hai décades nos patrones de construcción de gaites y na manera de tocales. Nes gaites con tercera neutra y subtónica que facíen dellos constructores del centru’l país y nes gaites de dixitación abierta o semiabierta que s’estilen hoi nes cuenques del Eo y del Navia, por poner dos exemplos, tenemos pistes abondes del trabayu que nos queda por facer a los gaiteros. Si tocamos una pieza tradicional d’una zona d’Asturies determinada, l’oxetivu ideal tien de ser facelo con una gaita que respete’l tipu constructivu d’esa zona y emplegar los recursos técnicos típicos del informante que la tocaba. El discu En Ca’l Gaiteiru fíxose con esa idea en mente».

Pedro Pangua, (Uviéu, 1962) fixo estudios de guitarra nel Conservatoriu Superior de Música de Madrid. Aprendió a tocar la gaita con maestros de la talla d’El Gaiteru de Veriña y El Xarreru. Foi fundador d’agrupaciones y formaciones musicales claves nel procesu de recuperación de música tradicional asturiana nos años 80, como Urogallos, Beleño, Ubiña o Xaréu. Pangua foi una figura imprescindible nel procesu de recuperación del oficiu de gaiteru cuando yá se taba perdiendo n’Asturies y desendolcó un papel importantísimu de tresmisión de conocimientu como maestru en escueles de música y baille. Tamién foi fundador y presidente del Conceyu de Gaiteros de 1990 a 1992, dirixó la Banda Gaites Fonte Fuécara y participó en nes primeres grabaciones de la música folk asturiana. Amás, foi profesor de la Escuela d’Asturianía –qu’entama’l Gobiernu d’Asturies– y ye un maestru na interpretación a la gaita, al tambor y un gran baillador tamién.

Diego Pangua (Uviéu, 1983) ye profesor de gaita del conservatoriu de música Eduardo Martínez Torner de la capital asturiana. Tien ganao’l concursu de gaita Memorial Remis Ovalle en delles ocasiones y el Troféu Macallan, en Lorient (Bretaña). Ye componente del grupu de folk Felpeyu y, amás de la gaita, domina la interpretación d’otros instrumentos, especialmente la xiblata.

El llibru ta a la venta nos comercios Musical Vila (Uviéu), Llibrería Paradiso (Xixón y Llibrería San Andrés (La Puela Ayande). Tamién puede mercase per corréu escribiendo a dpangua@gmail.com.

Be the first to comment

Leave a Reply

Tu dirección de correo no será publicada.


*