Escenines, el festival de Reciella, va facese pa final d’añu en Xixón

L’Asociación Reciella, de families pol asturianu, entama’l quintu festival «Escenines» pal mes d’avientu. Les actuaciones van ser nel salón d’actos del Centru Cultura Antiguu Institutu de Xixón y nel Colexu Públicu Jovellanos d’esa ciudá. Pal miércoles 27 d’avientu, a les siete la tarde, ta programada pa neños y neñes de más de seis años la obra Contábenmelo en casa, de Martín Peña y Carlos Alba ‘Cellero’, con cantares, cuentos y títeres n’homenaxe a la nuestra tradición oral.

Pal día siguiente, a la mesma hora, pensada pa rapacinos de más de tres años, va ofrecese ¿De qué color ye’l sol?, de la compañía Kamante Teatro, una obra que combina teatru y títeres p’averar a los espectadores a la música, los colores, la poesía y l’espaciu. Cuenta la historia d’un sol nun planeta imaxinariu que trai lloco a la xente porque cambia de color, asuntu qu’afecta a los neños qu’empiecen a rise, a berrar o a dormir ensin querer.

El vienres 29, tamién a les siete y pa mayores de tres años, el Callejón del Gato producciones (ganadores del premiu a la meyor industria cultural y creativa de Xixón 2017) representa la obra La neña de les trences al revés.

Escenines acaba’l sábadu a les doce la mañana col conciertu presentación del discu Bestiariu 3, con música pa neños y mayores de toles edaes. El títulu fai referencia a la tercer entrega de la serie de discos qu’edita La Fabriquina con cantares pa neños fechos por grupos de música asturianos que faen música p’adultos. Asina, melodíes pop, indie, folk, etc. dan aire a composiciones nueves con lletres pegadices. Les entregues anteriores de Bestiariu resultaron un éxitu total.

Reciella ye una asociación de families que promueve l’usu del asturianu más allá de les cases y de les escueles, y que fai actividaes que faciliten la convivencia ente neños y neñes, padres y madres que quieren falar asturianu, conocese y pasalo bien.

 

Be the first to comment

Leave a Reply

Tu dirección de correo no será publicada.


*