Espaciu Borines. Moblame y cerámica

Teresa Arrojo y Álvaro Corrales son dos artistes y artesanos que viven nel conceyu de Piloña, nel pueblu de Borines. Ella trabaya la cerámica con delles técniques faciendo unes esmaltaciones orixinales en pieces decoratives sutiles. Tamién trabaya la escultura de formatos grandes (les escultures d’Arrojo tan feches mayormente en barru refractario y porzolana y cocíes a 1300 ºC n’atmósfera reductora), la pintura con técniques mistes (óleos, acrílicos, llápices, tintes, testures…) y pieces de bisutería delicaes.

Teresa, que se formó en Galicia y nes Isles Baleares, tien una trayectoria amplia como artista, con bien d’esposiciones individuales y colectives en Santiago Compostela, Palma o Uviéu. Nel so trabayu como ceramista destaquen l’usu del blanco puro salpicao de colores intensos y vitales y el so gustu polos trabayos creativos seriales. Nel tarrén de la escultura, la so obra desendólcase en pieces –o conxuntos d’elles– ambientales, que s’integren con harmonía na naturaleza.

Álvaro trabaya la madera, fai restauraciones y pieces nueves de moblame y ye ún de los pocos constructores y reparadores de tambores asturianos. Amás de tambores en madera de faya o nozal, tamién fai bombos con o sin platillos. Los acabaos de los tambores failos nel azul y colorao tradicional, en madera natural o negros, xugando tamién na decoración col color de les cuerdes.

Espaciu Borines ye una galería d’arte con esposición permanente y tamién una manera mui bona de da-y vida a les antigües escueles de Borines.

Be the first to comment

Leave a Reply

Tu dirección de correo no será publicada.


*