Esther Prieto: Tres de la quema

Esther Prieto.
Esther Prieto.

El 17 de payares, la escritora Esther Prieto (Arenas, Cabrales, 1960) presentó n’Uviéu Tres de la quema / Después de la quema (Trea, 2016), un llibru onde axunta, en versión billingüe asturianu-castellanu, tola so poesía hasta la fecha, non solo lo que ta publicao nos poemarios Edá de la memoria (1992) y La mala suerte (2000), sinón tamién lo que foi escribiendo d’entós p’acá, dello inédito y otro publicao en revistes y periódicos.

La versión en castellanu fai, en sí mesma, otru llibru, un volume complementariu y non namás un mediu pa les persones con dificultaes pa entender l’asturianu. Como ella mesma apunta na introducción a los poemes, Prieto nun quixo facer equí una traducción lliteral, «polo que caún de los poemes tornaos al castellanu pue tomase como una reescritura del orixinal asturianu».

Tres de la quema / Después de la quema nun ye namás una sucesión de poemes ensin otra rellación ente sí que l’autora, sinón que, como señala Ángeles Carbajal nel prólogu, hai qu’entendelu «como un llibru unitariu […] porque se trata d’un llibru abiertu, d’un llibru en marcha, que se va escribiendo a midida que la vida avanza». Una vida, esta poética d’Esther Prieto, asentada nel pilar de la tristura, dalgo que, nesti casu, nun tien que ver col fatalismu, sinón col principiu de realidá.

La poesía de Prieto nun da oportunidá nenguna a lo inxenuo, la inocencia —y, con ella, les ilusiones, los enfotos– ye dalgo que quedó allá, al fondu de la infancia. En cuenta d’ello, Prieto ufiérta-y al llector verdá, una verdá válida p’andar pel mundu sabiendo ónde se pisa. Al mesmu tiempu, «descubrir la muyer que s’escribe nestos versos ye descubrir un sobriu y resquemante sentir, ye descubrir per ónde andó», diz con aciertu Carbajal, que-y agradez a l’autora, «como a los meyores poetes», «que nun empuerque’l mundu con güeros y embulladores ardiluxos lliterarios».

«Doite namás, y nun ye poco, / tenrures enfrentaes, muries qu’afrayen / los deseos, sorrises que nun cuayen», una declaración bien acabada d’intenciones que dexa al llector pendiente de los versos que vendrán.

Cubierta del llibru Tres de la quema.Tres de la quema / Después de la quema
Esther Prieto
Trea, 2016
160 páxines

Be the first to comment

Leave a Reply

Tu dirección de correo no será publicada.


*