Estrena de la obra ‘Muyeres Inesperaes’, de Dolfo Camilo Díaz, nel Teatru Xovellanos

El xueves 14 d’avientu ta d’estrena nel Teatru Xovellanos de Xixón la obra Muyeres Inesperaes, una producción de Ververemos con testu del escritor y dramaturgu Dolfo Camilo Díaz. La función ye a les ocho y media la tarde y enriba les tables van xuntase les actrices Isabel Friera, Carmen Gloria García, Bea Canteli, Elisabet Martín Riaño, Ana Váquez y la directora de la obra, Nieves Fernández.

Muyeres Inesperaes ye, en palabres de Camilo, «una kdada femenina ensin previa convocatoria, una fiesta de piyames ensin fiesta, un ritual sexual ensin ritu… Seis muyeres con frenu y marcha p’alantre, seis personaxes que nun necesiten esperar pol autor… L’engañu, la traición… Cuatro pieces curties entellazaes onde manda la mentira, el deséu… Y una sonrisa revolucionaria. (Penélope hai tiempu que yá nun fila… ¡Y lo mesmo ta deprendiendo a ser feliz colos sátiros!)».

Dolfo Camilo ye ún de los escritores más veteranos y prolíficos de les lletres asturianes, y tien firmao narrativa –con obres tamién pa públicu mozu– y teatru. La última obra escénica que se representó del autor ayerán foi País. Una traxicomedia asturiana, nel añu 2004, que tuvo un éxitu descomanáu. L’autor ganó tamién, en dos ocasiones, el premiu Xosefa de Xovellanos de novela.

La encargada de la producción de Muyeres Inesperaes ye Ververemos, grupu profesional de Teatru qu’empezó a furrular en Xixón nel 2011. La dirección ye de Nieves Fernández, llicenciada en Dirección d’Escena. Conociendo la calidá de les seis actrices y la creatividá del autor del testu, seguro que la obra va dar el campanazu.

Be the first to comment

Leave a Reply

Tu dirección de correo no será publicada.


*