Fame Poétika lleva a Burdeos la lliteratura n’asturianu

Diego Solís y Nacho Iglesias ‘Wings’, miembros del colectivu Fame Poétika, van participar el vienres 24 de payares nel Recital de Poesía Mundial qu’organicen, a comuña, el colectivu asturianu y l’asociación francesa Les Lettres Babel. L’actu, que va empezar a les 17:30 hores y va celebrase nel Tchaï Bar de Burdeos, va mecer poesía y música, y tanto Solís como Wings van lleer poemes propios y d’autores que-yos presten, amás d’interpretar dalgún cantar compuestu a partir de testos lliterarios.

La oportunidá d’esta participación de Fame Poétika –ún de los colectivos culturales más activos del momentu n’Asturies– surdió a partir del contactu de Nacho Wings –que ta estos meses estudiando en Burdeos– con Les Lettres Babel, una asociación que se dedica, principalmente, a la organización de clubes de llectura y alcuentros lliterarios. Los miembros d’esti grupu compartieron con Wings el so esmolimientu porque nes instituciones académiques franceses céntrense, sobre too, nel estudiu de la lliteratura del país y dexen arrequexada la obra d’autores qu’escriben en llingües distintes del francés. Nesti sen, la oportunidá de poder dar a conocer una lliteratura como l’asturiana, a la que nun tienen un accesu fácil, paeció-yos mui interesante y punxéronse, mano a mano, a preparar l’actu d’esti vienres.

A lo llargo de dos hores, tanto los miembros de Fame Poétika como los de Les Lettres Babel van lleer testos n’asturianu y francés pero tamién en llingües como l’italianu, el castellán, el chinu o’l serbiu, nuna demostración de que la pluralidá llingüística pue nun ser una torga pa la comunicación, sinón tolo contrario, una oportunidá p’alcontrase xente de procedencia mui estremada que comparte la pasión pola pallabra precisa.

Diego Solís (Xixón, 1991) ye graduáu en Llingua Española y les sos Lliteratures na Universidá d’Uviéu y fundador del colectivu Fame Poétika, col qu’editó les antoloxíes Fame Poétika y Seguimos con fame. Amás, tien publicao dellos poemes en revistes como Anáfora o Poesía, alma de mundo y ta pa sacar el so primer llibru de poesía en castellanu, Hágase abril. En cuantes a Nacho Wings (Xixón, 1997), tien participao en bien de certámenes lliterarios col colectivu Fame Poética; dende’l 2014, forma parte del conseyu de redacción de la «revista de lliteratura mui moza» Formientu, y los sos poemes atópense, amás de nesta revista, na antoloxía Fame Poétika.

Be the first to comment

Leave a Reply

Tu dirección de correo no será publicada.


*