Fernando Gutiérrez. Talentu reconocíu

Hai diez años que nacía la TPA, la televisión pública asturiana. Anguaño cualquier asturianu ye quién a identificar el so logotipu. Pocos sabrán que ye un trabayu del diseñador Fernando Gutiérrez, que tamién fizo’l logo de Laboral, Ciudad de la Cultura y Centro de Arte y Creación Industrial o’l del Consorciu de Tresportes d’Asturies. Tres imáxenes corporatives que nacieron na época de vaques gordes anterior a la crisis económica por encargu del Gobiernu asturianu, que d’aquella presidía Vicente Álvarez Areces.

Fernando Gutiérrez ye un diseñador gráfico británicu fíu de padres españoles –el pá ye cabraliegu–. Estudió diseñu gráficu nel London College of Printing y, en 1993, instalóse en Barcelona, que foi na ciudá onde se formó como diseñador nos años de los Xuegos Olímpicos y onde fundó, a comuña con Pablo Martín, la empresa Gráfica.

Tien collaborao comgo director d’arte de publicaciones bien populares, como la revista qu’edita la marca de moda Benetton, Colors – onde tuvo la oportunidá d’esperimentar fórmules gráfiques nueves con llibertá trabayando con un equipu mui mozu–, o’l suplementu dominical y el Tentaciones del diariu El País. Gutiérrez trabayó nos once primeros númberos de la revista cultural Matador, cadún fechu con una tipografía distinta. Nel añu 2000, llegó a sociu de la oficina de Londres de la compañía Pentagram Design y, en seis años, fundó un estudiu propiu col so nome na mesma ciudá.

Dientro de los veceros pa los que trabaya alcuéntrense museos bien importante como El Prado y la Tate Gallery, o empreses privaes de fama internacional, como’l restaurán El Bulli o delles bodegues españoles relacionaes col enólogu Telmo Rodríguez.

Nel año 2014 concediéron-y la máxima distinción del mundu del diseñu en Gran Bretaña, el títulu de Royal Designer for Industry, que premia a británicos que faen trabayos que beneficien a la sociedá y mantienen la escelencia nel diseñu y el valor estéticu. Fernando Gutiérrez ye un diseñador analóxicu, trabaya ensin ordenador, a mano, y piensa que’l papel del diseñador gráficu ye «dir a la busca de lo auténtico». Tien creao una tipografía, que bautizó col nome de Bulnes, pero que ta ensin comercializar.

Be the first to comment

Leave a Reply

Tu dirección de correo no será publicada.


*