Festival Mediu Güeyu en Rozaes: cine y vida na aldea

Secuencia de la película ‘Amama’.
Secuencia de la película ‘Amama’.

Curtiometraxes y cine que nun ye de lo comercial pa reivindicar la vida en pueblu. Cultura alternativa al sistema d‘ociu mayoritariu pa facer pensar y pa defender lo diferente contra lo global, contra lo uniforme. Un escenariu pa enseñar otres maneres de ser, de facer, de pensar y de crear. Estes son les razones de ser del Festival Mediu Güeyu, una muestra y concursu de curtios que se va facer en Rozaes y en Villaviciosa los díes 4 y 5 de payares.

La séptima edición d‘esti eventu –que lu entama una asociación maliayesa, y que nun ye pa sacar perres– empieza‘l sábadu día 4 en pueblu de Rozaes y faise cola collaboración de los vecinos. A les once la mañana va proyectase la película Tic-tac pa la xente menudo, una obra del añu 1997 mui diferente del cine que se fai anguaño pa rapacinos. La proyección va contar cola presencia de la directora, Rosa Vergués, que va facer una presentación.

La programación va siguir cola emisión ensin parada hasta les seis de les obres finalistes, esbillaes d‘ente los 190 curtiometraxes que concursaron, y que nesta edición tán estremaos en cuatro categoríes: agua (onde tan los de temática relacionao cola salú y la vida sana), tierra (los que traten sobre los derechos humanos), aire (los que falen del mediuambiente) y fueu (los que reparen nes rellaciones). Les obres –que van proyectase nun solhorru, nun llavaderu, nuna tenada y nuna cuadra– tienen que tar feches n‘asturianu o castellanu, o llevar subtítulos nuna d‘estes llingües. Esti añu hai participación d‘obres grabaes n‘inglés, francés, portugués, catalán y polacu, amás de nos dos idiomes oficiales del festival.

Les obres más votaes en cada categoría van emitise nel Teatru Riera de Villaviciosa‘l domingu día 5, de tarde. Nesa gala de clausura, onde va tocar el grupu asturianu La Txusma, un xuráu independiente va dar un premiu de 400 euros y una escultura del artista maliayés Pablo Maojo a la obra que-yos paeza que lu amerita más.

Pero‘l Festival Mediu Güeyu ye más que cine y, nél, tamién la música, l‘arte y la lliteratura tienen espaciu. El sábadu día 4, pela mañana, nel apartáu musical, van tocar «Les Pandereteres de Rozaes» y «Los Figueros»; amás van intervenir los poetes Alba G., El Suárez y Fran Priegue xunto col artista Rubén Fernández, que va facer una performance. Pa cerca les dos, na sesión vermú, ta prevista l‘actuación de L-R, el duu de post-folk que formen Leticia González y Rubén Bada.

Pa la hora xintar, la organización del festival tien programada una comida «de traxe», onde caún lleva lo que quier cola idea de compartir mesa toos a comuña. Y, a les seis, va sonar un conciertu de Melanie Moers col proyectu musical d‘ella, que se llama One woman band. Detrás, va proyectase la película Amama, del director vascu Asier Altuna, un llargumetraxe –rodáu nun caseríu– onde los diálogos son pocos y xuégase mucho cola poesía visual y cola voz de la narradora. Amama (‘güela’ n‘eusquera) cuenta los enguedeyos que tienen les xeneraciones d‘una familia que vive na aldea. La película estrenóse nel 2015 y retrata los choques de lo urbano contra lo del pueblu, los padres contra los fíos, la tradición contra‘l progresu y el pasáu contra‘l presente. Al acabar esta gran película, va facese un coloquiu col director, con Ignacio Abella (escritor y espertu n‘árboles) y con Paula Cristóbal (integrante del grupu de música tradicional Herbamora y de la cooperativa de producción ecolóxico El Nocéu). Pa rematar el día, nada meyor qu‘una espicha en Casa Eladia pa la qu‘hai qu‘apuntase por anticipao.

El Festival Mediu Güeyu entamáronlu mocedá del conceyu maliayu que tuvieron qu‘emigrar por culpa de la falta de trabayu n‘Asturies y que comparten l‘afición pol cine y la defensa de la vida en pueblu. La muestra llena esta séptima edición con doce hores de creación audiovisual, musical, lliteraria y artística nun pueblu: Rozaes. Nun hai meyor manera de reivindicar la vida na aldea que dándo-y vida, averando a los vecinos a les creaciones artístiques y averando a la xente de les ciudaes a los pueblos.

Be the first to comment

Leave a Reply

Tu dirección de correo no será publicada.


*