Filandón en Monasterio de Hermo, la pintura viviente

'Filandón en Monasterio de Hermo' (1872), de Luis Álvarez Catalá.
'Filandón en Monasterio de Hermo' (1872), de Luis Álvarez Catalá.

Nun ye nada habitual que se programe n’Asturies la representación d’una pintura viviente y muncho menos la d’una obra con más de venti personaxes. El Conceyu d’Uviéu ta acabante facelo dientro de la Nueche Blanca que se cellebra’l 8 d’ochobre. La recreación va facese nel Muséu de Belles Artes, na sala 19 del Edificiu de l’Ampliación, y va ser d’una de les obres de la nuestra pinacoteca nacional: la titulada Filandón en Monasterio de Hermo, de Luis Álvarez Catalá (Madrid, 1836-1901).

La escena compónse con un montón de personaxes que tán nuna l.lariega nel pueblu de Monasteriu d’Ermo, conceyu Cangas, (la de la casa del padre del pintor) aprovechando una nueche del iviernu pa filar llana. La mayoría de les muyeres tán filando, un par d’elles tocando pandeiros y cantando, otres falen. Nestes xuntances, mui comunes na vida rural asturiana, tamién teníen entrada los homes, anque nel cuadru son minoría, destacando en primer planu un madreñeru. Un filandón yera una oportunidá pa cortexar y pa rellacionase los vecinos aprovechando’l calor y la lluz d’una casa pa toos.

La obra tien un formatu bien pequeñu (33×46 cm) pero ye d’una guapura y calidá pergrandes. La pincelada de Catalá repara hasta na última menudancia, destacando la indumentaria y el calzáu de los personaxes. El tratamientu de la lluz nesti cuadru fai rescamplar ente la penumbra la fuercia del color de la ropa y enseña la influencia que tuvo nel artista la pintura flamenca y holandesa del sieglu XVII. Esti llenzu, como munches otres obres pictóriques y grabaos, resultó una fonte d’información imprescindible pa la recuperación de la manera de vistir asturiana d’esos tiempos.

Agora, el Conceyu de Cultura Tradicional Vezos Astures –un grupu que lleva más de quince años trabayando pola investigación y la difusión del baille y la indumentaria tradicional asturianos– xunto con más collaboradores y baxo la coordinación de Gloria Roza, va facer homenaxe a Álvarez Catalá y va ciarrar el círculu de comunicación ente la obra y el públicu, ente la época retrada y la d’anguaño. Pa la ocasión, van vistir tamién pieces d’indumentaria tradicional antigües pertenecientes a la colección de Javier Emperador. La producción d’esti tableau vivant, que se va representar a les once y a les doce la nueche y a la una la mañana, ye de B. Alto.

Luis Álvarez Catalá foi un pintor románticu mui premiáu nel estranxeru y destacó polos temes costumistes asturianos y como retratista. Tamién llegó a ser director del Muséu del Prado.

Be the first to comment

Leave a Reply

Tu dirección de correo no será publicada.


*