Francis Bacon: la forma pictórica d’un alma frayada

Tres estudios pa una Crucifixón (Three Studies for a Crucifixion), 1962. Oleu sobre llenzu. © The Estate of Francis Bacon.
Tres estudios pa una Crucifixón (Three Studies for a Crucifixion), 1962. Oleu sobre llenzu. © The Estate of Francis Bacon.

HENRIQUE G. FACURIELLA
Cualquier momentu ye bonu –siempre que se tenga la entereza d’ánimu necesaria– pa volver a la obra de Francis Bacon. Por eso, hai qu’agradecer al Muséu Guggenheim Bilbao la esposición que, hasta’l 8 de xineru del 2017, -y dedica al pintor irlandés: Francis Bacon: de Picasso a Velázquez. Nesta muestra puen recorrese más de seis décades de creación pictórica de Bacon con una peculiaridá mui interesante: los sos cuadros preséntense al par de los de dellos maestros españoles y franceses que tuvieron una influencia grandísima na pintura del primeru.

Bacon ye fíu —anque él quiciabes s’intitularía meyor como «productu»– de dos devenires: per un llau, el biolóxicu-familiar, y, per otru, l’históricu-filosóficu. En cuantes al primeru, Bacon, que nació en Dublin el 28 d’ochobre de 1909, foi’l segundu de cinco hermanos nacíos nuna familia inglesa afincada n’Irlanda, una familia de la que’l propiu Bacon diz: «A mi nun m’educaron de nenguna manera. Nun facía otro que trabayar na casería de mio padre», un padre que lu echó de casa con 16 años. Bacon tola vida careciera d’asma producío pola alerxa a los perros y los caballos pero’l padre tenía esto por floxera y obligábalu a acabalgar. Amás, siempre reconoció la so atracción sexual polos homes —«gústenme los homes, gústame’l so cerebru y la calidá de la piel», va llegar a dicir—, una atracción física que s’estendía tamién a so padre y que s’amestaba col odiu que sentía hacia él pola so brutalidá.

En cuantes al devenir históricu y filosóficu, la época de Bacon ye —si se permite la espresión— la del «entierru de Dios» (depués de la muerte de Dios que decretara Nietzsche mediu sieglu enantes). Na Ilustración arranca una secularización progresiva qu’empieza cola negación de l’autoridá al Papa pa imponer dogmes y sigue, a lo llargo del sieglu XIX, al treslladar el fundamentu del orde social dende los valores relixosos a la ciencia y el racionalismu. En palabres del profesor y escultor dominicu Miguel Iribertegui Eraso —autor, ente otres obres, de la Puerta de Santa Bárbora de la catedral d’Uviéu—, nun cursu que dio en marzu de 1999 en Salamanca, esto va abrir la puerta a la suxetividá y la individualidá nel tarrén de les creencies —nun hai dogmes, la única autoridá aceptable ye la del propiu individuu, niégase la necesidá de mediación y hasta de la resurrección—.

Nel campu del arte —sigue’l razonamientu del profesor Iribertegui—, coles vanguardies llega la esperimentación, la fragmentación de les corrientes y l’estrozu o, como poco, la deformación de la figura. Depués de les dos guerres mundiales, l’arte va negar la naturaleza o va deformala. «Niégase a Dios machucando la so obra», va dicir entós Iribertegui.

Estudiu p'autorretratu (Study for Self-Portrait), 1976. Oleu y pastel sobre llenzu. © The Estate of Francis Bacon.
Estudiu p’autorretratu (Study for Self-Portrait), 1976. Oleu y pastel sobre llenzu. © The Estate of Francis Bacon.

Nesti ambiente filosóficu y artísticu, l’alma frayada de Francis Bacon va atopar un sitiu ideal —si ye que se pue usar esta palabra– pa materializar tolo que llevaba dientro. Bacon va intervenir na figura humana deformándola al mesmu tiempu que caltién la identidá. Esta forma d’intervención ye, en palabres d’Iribertegui, «blasfema, porque lo blasfemo pertenez a lo relixoso, solo blasfema’l creyente». Tola pintura de Bacon trata sobre l’home —imaxe de Dios—, de manera que, al deformar al primeru, menta, de dalguna manera, al so creador y modelu.

Esta concepción da orixe, polo tanto, a una teoloxía y a una antropoloxía, pero tamién a una autoloxía. Quier dicise, nos sos autorretratos, Bacon vese —y esprésase— a sí mesmu como una criatura malograda, dalgo que va compartir con dalgunos contemporáneos, como Emil Cioran o, inclusive, Pessoa. «Caún sufre en carne propia esta unidá de desastre que ye’l fenómenu home», diba dicir Cioran nel so Breviariu de podrén (Précis de décomposition). Tal como s’apunta na nota esplicativa de la esposición del muséu vascu, estos seres paecen destinaos «namás qu’a lluchar ente sí o a caltener rellaciones sexuales», como les que se ven nel trípticu Tres estudios de figures enriba de cames (Three Studies of Figures on Beds) (1972). Nesta obra amuésase, pal so biógrafu Andrew Sinclair, la «desesperación eufórica», una euforia venceyada a los rellatos de la mitoloxía griega que Bacon lleó n’abondancia y una desesperación que naz, en bona midida, de la consideranza que tenía la homosexualidá na época de Bacon: cuando nació, les rellaciones homosexuales taben tipificaes como delitu, hacia 1955 pasó a considerase un trestornu asemeyáu a la cleptomanía o l’alcolismu y, anque en 1967 el Parllamentu británicu sacó’l sexu ente homes del códigu penal, Bacon yá llevaba enriba l’alma cuatro marques: «aislamientu, illegalidá, inseguridá y culpa», tal como indica Sinclair.

Sicasí, ente tola retafila d’amantes que tuvo a lo llargo de la vida, hai ún que lu va marcar especialmente: George Dyer, un lladrón mui curiosu al que diba conocer en 1964. Nel cuadru de 1966 Retratu de George Dyer falando (Portrait of George Dyer Talking), anque la figura del amante sufre la mesma deformación que cualquier otru personaxe de Bacon, el pintor va asitiar a Dyer nel centru de la escena, como nun pedestal, pa remarcar la so condición de centru na existencia del artista. El suicidiu de Dyer en 1971 diba llevar a Bacon a un duelu intensísimu, que va quedar espeyáu n’obres como’l trípticu pintáu ente mayu y xunu de 1973 (conocíu tamién como «De la sombra»), onde describe’l procesu de la muerte del amante por una sobredosis d’alcohol y barbitúricos, o trípticu llamáu «De la escalera», ún de los que tresmiten más calidez y onde se pue ver a los dos amigos nel actu d’abrir xuntos la puerta de casa.

Tres estudios de figures enriba de cames (Three Studies of Figures on Beds), 1972. Oleu y pastel sobre llenzu. © The Estate of Francis Bacon.
Tres estudios de figures enriba de cames (Three Studies of Figures on Beds), 1972. Oleu y pastel sobre llenzu. © The Estate of Francis Bacon.

Volviendo al tema de la deformación del ser humanu —y, por estensión, de Dios—, una de les obres que se pue ver estos díes en Bilbao, Tres estudios pa una Crucifixón (Three Studies for a Crucifixion) (1962), amuesa bien a les clares el planteamientu qu’esponíemos al principiu. Acordies col so descreimientu, non solo-y quita a la crucifixón cualquier conteníu cristianu, sinón que nella trata l’horror —la carne animal espiezada, la brutalidá— igual que los pintores medievales y barrocos trataron lo sagrao (lo que vien a ser una suplantación, quier dicise, un afondamientu no blasfemo de lo que se falaba arriba). Nesti sen, ye interesante lleer lo que’l propiu Bacon diz sobre esti cuadru nuna de les entrevistes que caltuvo col críticu d’arte David Sylvester: «Fíxila en menos de 15 díes, nuna época que bebía muncho, ente borracheres y resaques. Pero tenía ganes d’abordar dalgo asina, como un guxán que repta. […] Siempre m’impresionaron los temes de mataderos y sangre, mui averaos a la crucifixón».

Esti planteamientu va vali-y a Miguel Iribertegui pa dicir que, «si Velazquez foi testigu en tola so obra de la “dignidá humana, tan desafiante”, Bacon, suxetu veraz del sieglu XX, yera la negación de la verdá sagrada», una afirmación que nos lleva a otru de los polos qu’articulen la esposición del Guggenheim, la rellación de la so pintura cola de Diego Velazquez. Anque’l pintor irlandés sintió almiración por dellos maestros españoles, como Zurbarán, El Greco o Goya, va ser Velazquez el que lleve a Bacon a cotes que rocen la obsesión, como la que tuvo pol retrato del Papa Inocencio X que Velázquez pintó en 1650 y alrededor del que Bacon llegó a facer más de cincuenta obres. Nunes, va añadir a la figura del Papa —que Velazquez representara con tola so dignidá pontificia– «una indignación absoluta», mentes que n’otres –por exemplu, nes qu’encierra’l personaxe nuna xaula– Inocencio X «ya nun ta pintáu como Papa, sinón puramente como espécime del poder humanu», según esplica’l propiu Bacon.

Estudiu d'un güe (Study of a Bull), 1991. Oleu, pintura n'aerosol y polvu sobre llenzu. © The Estate of Francis Bacon.
Estudiu d’un güe (Study of a Bull), 1991.
Oleu, pintura n’aerosol y polvu sobre llenzu. © The Estate of Francis Bacon.

L’almiración por España y polos maestros españoles va espresala tamién na representación de figures totémiques de la cultura ibérica, como la del güe. Nun yera aficionáu a les corríes de toros como lo fuera Hemingway, pero, igual qu’ésti, considerábales «un aperitivu maraviyosu pa enantes del sexu», amás de veles como la pervivencia de la traxedia antigua. Igual qu’asocede na traxedia, nel sable de la plaza la pasión amorosa y la muerte van xuntes. Na so vida, tamién diben talo: enamoráu d’un inxenieru español, va visitar Madrid na primavera de 1992; unos díes más tarde, ingresa na clínica de les Sierves de María, onde muerre d’un paru cardiacu’l 28 d’abril, mui cerca del Muséu del Prado.

Be the first to comment

Leave a Reply

Tu dirección de correo no será publicada.


*