‘Incunabula universitatis’, de la Universidá d’Uviéu, Premiu Nacional d’Edición Universitaria

Cubierta del llibru 'Incunabula universitatis' | Foto: Estudiu de Manuel Fernández.
Cubierta del llibru 'Incunabula universitatis' | Foto: Estudiu de Manuel Fernández.

La obra Incunabula universitatis. Los incunables de las bibliotecas universitarias españolas, que publicó la Universidá d’Uviéu, recibió’l Premiu Nacional d’Edición Universitaria na categoría d’obra meyor editada nel 2015.

La coordinación de llibru, que recueye 981 incunables de 21 biblioteques universitaries del Estáu –ente elles la d’Uviéu–, ye de Ramón Rodríguez, director de la Biblioteca Universitaria, mentes que’l diseñu lleva la firma de Manuel Fernández. El volume destaca por dellos motivos, ente los que se pue citar el procuru na maquetación, l’usu de tintes metáliques –inclusive pa los gráficos– o’l rigor col que se trataron les ilustraciones qu’adornen los incunables.

En palabres del coordinador de la obra, Ramón Rodríguez, esti llibru «ye tanto como facer un recorríu pela biografía de los incunables, amás d’una descripción de los exemplares únicos, raros y destacaos qu’existen nes nuestres biblioteques». Nesti puntu, hai que recordar que s’entiende por incunable cualquier llibru impresu dende la invención de la imprenta de tipos móviles (mediaos del sieglu XV) hasta’l día de Pascua del 1501.

Interior del llibru 'Incunabula universitatis' | Foto: Estudiu de Manuel Fernández.
Interior del llibru ‘Incunabula universitatis’ | Foto: Estudiu de Manuel Fernández.

El xuráu del concursu consideró qu’Incunabula universitatis «supón una xera de recopilación y síntesis del patrimoniu bibliográficu qu’hasta’l momentu nun se fixera». Con una encuadernación de luxu y una reproducción d’imáxenes d’una calidá altísima, el tribunal destacó tamién «la escoyeta tan valiosa y cuidada de los incunables incluíos nesti tomu magníficu».

Esti gallardón promuévelu la Unión d’Editoriales Universitaries Españoles (UNE) col oxetivu d’averar la producción editorial universitaria a la sociedá. Nesta ocasión, el xuráu integráronlu les personalidaes siguientes: Víctor García de la Concha, director del Institutu Cervantes; Vicent Climent, rector de la Universidá Jaume I; Manuel Rodríguez Rivero, críticu lliterariu; Manuel Toharia, divulgador científicu; Nuria Azancot, xefa de redacción d’El Cultural d’El Mundo; y Francisco Javier Rodríguez Marcos, responsable de llibros del suplementu Babelia d’El País.

Be the first to comment

Leave a Reply

Tu dirección de correo no será publicada.


*