La banda feroesa STESO álzase col trunfu nel Suns Europe

Actuación de los feroeses STESSO nel festival Suns Europe.
Actuación de los feroeses STESSO nel festival Suns Europe.

El grupu de música electrónica STESO algamó, col cantar «Bruni», el premiu del xuráu nel festival Suns Europe, que se celebró’l sábadu 3 d’avientu na ciudá friulana d’Údine (Italia), y qu’axuntó a diez bandes de toa Europa que canten en llingües minorizaes. El premiu del públicu foi pal tema «Kakomey», de la intérprete rusa Veronika Usholik, que cantó en llingua chukchi, un idioma que se fala nel estremu oriental de Siberia. Suns recoyó l’añu pasáu’l testigu del festival Liet International, qu’organizaba la fundación Liet, asitiada en Frisia (Países Baxos).

Actuación de la banda gallega Familia Caamagno. | Foto: Radio Onde Furlane.
Actuación de la banda gallega Familia Caamagno. | Foto: Radio Onde Furlane.

Nesta edición de Suns Europe participaron diez grupos de tol continente européu, ente los que tuvieron los gallegos Familia Caamagno, una banda qu’amiesta rock, rhythm & blues y garage y que, depués d’una votación mui axustada, algamó’l tercer puestu na clasificación. Ellos foron los únicos representantes ibéricos nel certame, onde, amás de los ganadores y de la banda gallega, compitieron les bandes y solistes Doro Gjat (Friuli, Italia), Berdon (Ladinia, Italia), Norma (Frisia del Norte), Imlé (Irlanda), Rory Mcgrath (Cornualles), Brieg Guerveno (Bretaña), y Gurude (Khakasia, Rusia).

Sicasí, el festival Suns Europe tresciende lo puramente musical, al axuntar, a lo llargo de cinco díes, a artistes de disciplines estremaes —de la música al cine o la lliteratura— que tienen en común el trabayar en llingües minorizaes. Según los organizadores, Suns quier ser un sitiu pal alcuentru y l’intercambiu ente artistes, idiomes y comunidaes qu’usen les llingües propies pa falar de sí mesmos nun diálogu abiertu a la diversidá cultural.

Tolos cantares participantes nesta edición puen oyese na cuenta que la organización del festival tien abierta en Souncloud.

Be the first to comment

Leave a Reply

Tu dirección de correo no será publicada.


*