La Bande echa a andar la xira ‘Ex libris’ con un conciertu nel Café Paraíso

La Bande.
La Bande.

La lliteratura foi, dende’l principiu, ún de los pegoyos onde asienta la propuesta musical de La Bande, non solo porque consideren que les lletres son una estaya d’esa tierra que ye la lliteratura, sinón porque munches de les sos canciones nacieron ex libris, quier dicise, d’ente los llibros. Ye’l casu de «Plata quemada», «Arturo Belano o el cámping Estrella de mar» o «El refugio», conteníes nel discu Un cadáver exquisito, que surdieron de noveles de Ricardo Piglia, Roberto Bolaño o Cormac McCarthy.

Esta característica de la creación musical de La Bande, aunida a la bona esperiencia del grupu nel conciertu que dieron a finales d’ochobre na llibrería Tuuulibreria Lavapiés (Madrid), fixo a los componentes del grupu empezar a da-y vueltes a la idea d’una xira fuera de los locales habituales de conciertos. Esta idea materializóse na xira Ex libris, cola que van llevar la so música «al silenciu de les llibreríes» de tola península Ibérica pa, como ellos mesmos anuncien, «glayar nel templu y rezar nel glayíu».

Sicasí, la xira arranca nun bar –anque asitiáu ente dos llibreríes (la Cervantes y la Campoamor d’Uviéu)–: el Café Paraíso (cai Doctor Casal 9, Uviéu), un local al que consideren la so «casa intelectual y emocional». Esti primer conciertu va ser el vienres 17 de payares a les 20:30 hores y va tener un formatu acústicu, íntimu y ensin amplificar, el mesmu que quieren llevar per llibreríes y cafés d’España y Portugal.

La Bande, formada nel 2010 al calor d’un cursu de branu de jazz nel Antiguu Institutu de Xixón, compónenla anguaño Pablo Elías Viejo (baxu), Charly García Robla (batería), Cristóbal Iglesias (trompeta y trombón), Miguel Nicolás (guitarra) y Xaime Martínez (guitarra y voz). Dende los sones jazzísticos iniciales, el so estilu va evolucionar a dalgo qu’anda ente’l pop, la canción d’autor y la música tradicional. Nel 2012 publiquen la primer maqueta, col títulu Las naves espaciales no tienen marcha atrás y, a primeros del 2014 empiecen una campaña de crowdfunding que-yos va permitir grabar el primer LP, La llamada del Hombre Ciervo (La Granja Records). En setiembre d’esi mesmu añu reciben el premiu Diesel Next Rock Star, qu’organiza la revista Rolling Stone, lo que los lleva a dar dellos conciertos en Madrid y a grabar un EP nuevu: Un cadáver exquisito.

 

Be the first to comment

Leave a Reply

Tu dirección de correo no será publicada.


*