La lleenda viva del «Afrobeat»

Super estrella d’África, compositor, cantante y músicu –amás d’activista políticu–, el nixerianu Fela Kuti foi la polémica personificada. Nació en Llagos, Nixeria, un 15 d’ochobre de 1938 y los sos pas bautizáronlu como Hildegart Ransome, siguiendo la suxerencia d’un misioneru alemán.
Pero años depués, de la que diba garrando conciencia de la so raza, l’artista nixerianu consideró qu’esi yera un nome d’esclavu y decidió cambialu pa pasar a llamase Fela, (‘aquél de quién sal la grandeza’) Anikulapo (‘el que tresporta la muerte nel so carcaj’) Kuti (‘el que nun pue morrer a manes del home’). Cuando tenía 59 años, n’agostu de 1997, la so alma negra y caliente dexó de llatir. La so muerte foi un fechu escuru porque siempre se negó que fora’l sida –una enfermedá rellacionada col home blancu– lo qu’acabara cola so vida. Kuti tenía 27 muyeres y la promiscuidá provocó-y el sarcoma de Kaposi, que-y causó la muerte. Sicasí, él nunca vio la rellación ente ser promiscuu y el sarcoma: asina, nuna de les sos últimes canciones criticaba l’usu hixénicu del preservativu por ser contrariu a la cultura africana.
Una de les munches lleendes que tán alredor d’esta figura de la música asegura que’l músicu y políticu nixerianu realmente morrió asesináu pol Gobiernu con una inyección letal. Esi 2 d’agostu de 1997, na capital nixeriana –avezada a tou tipu de conflictos nes cais– cuasi nun hubo delitos porque «toles persones que lu amaben taben nel so funeral», según contaba ún de los sos fíos. Foi un entierru al qu’asistieron más d’un millón de persones. Esa yera la fuerza d’un revolucionariu que, de nun matalu un virus, seguramente diba morrer poles tortures y palices que sufría a manes de la policía y les autoridaes de Nixeria.

Be the first to comment

Leave a Reply

Tu dirección de correo no será publicada.


*