La Marina. Vezos Astures

La Marina. Foto: Xurde Margaride.
La Marina. Foto: Xurde Margaride.

Dientro de la programación del festival Arcu Atlánticu de Xixón pudo vese la muestra de folclor La Marina, entamada pol Conceyu de Cultura Tradicional Vezos Astures. Nuna hora llarga interpretáronse nel patiu del Antiguu Institutu de Xixón pieces pal baille y cantares recoyíos nesta fastera d’Asturies. La Marina, La Mariña o Les Mariñes ye la franxa de tierra –la mayor parte de les veces llana– qu’hai ente la mar y los primeros cordales. Tamién hubo pieces nesti espectáculu de temática marinera recoyíes más pal interior del país y que llegaron a eses zones peles rutes comerciales ente los puertos y villes costeres y les sos árees d’influencia.

La Marina ye un espaciu xeográficu qu’inclúi dos tradiciones culturales hermanes pero diferentes: una, propia de villes y pueblos marineros como Llanes, Llastres, Tazones o Cuideiru, y otra que representa a les aldees de la costa asturiana, d’economía agraria y ganadera. Nel repertoriu d’esta muestra baillóse El Pericote de Llanes; Xiraldilles de Bargaéu (Piloña), Villaviciosa, Xixón y Viodo (Gozón); la Xota del Oriente; la Xota y El Perlindando de Cuideiru, y delles melodíes de xota del occidente recoyíes n’A Veiga y El Franco. Nel espectáculu danzáronse les dances de la Guía de Llanes, de San Roque de Tazones y de San Pedru de Cuideiru y interpretáronse fragmentos de La Salea de La Madalena de Llanes y cantares como Yá nun soi marineru, Calle la del Rivero, El Romance del marineru al agua y una habanera, recoyíos toos ellos n’Avilés, Salas y Tazones. Les pieces tocaes pal baille acompañáronse, según el casu, de gaita y tambor, pandereta, pitos y castañueles o acurdión.

Vezos Astures, depués de quince años de vida, tien demostrao que ye ún de los grupos que más cuiden la interpretación de los bailles y cantares del país, d’una manera fiel a la tradición y a los materiales recopilaos de los informantes. Otru aspectu pol que destaca esti Conceyu de Cultura Tradicional ye pola indumentaria que viste. Nesta muestra de La Marina pudieron vese delles pieces antigües orixinales en traxes de gala del oriente y centru d’Asturies, traxes de diariu y de gala de les aldees y traxes de marineros y de les sos muyeres, que tamién trabayaben nos cais de los puertos llimpiando’l pescáu, carretándolo o vendiéndolo pelos mercaos. Vezos Astures tamién llevó esta muestra hasta tierres de Zamora, onde participó nun festival internacional d’esta ciudá. La última representación d’esti añu va facese’l vienres 19 d’avientu nel teatru San Francisco de Llión a les ocho y media de la tarde.

Semeyes de Xurde Margaride. Cortesía de Vezos Astures.

Be the first to comment

Leave a Reply

Tu dirección de correo no será publicada.


*