La mirada perdida

ALBERTO SUÁREZ
Descubrí la obra de Chema Madoz (Madrid, 1958) hai venti años nes páxines de la revista Visual. Quedé rendíu por completo al talentu creativu, a la calidá y al acabáu de les sos obres. Madoz xenera y retrata unes composiciones d’oxetos comunes que, por amiestu a otros oxetos o elementos descompuestos d’ellos, faen una obra, que podemos calificar de poesía visual, onde rescamplen significaos nuevos –non evidentes–, de los oxetos orixinales. Munches veces, les composiciones tienen elementos de la naturaleza o reproducciones d’ella y combínense con preseos o coses manufacturaes. Otres veces, la natura ta ausente. En cualquier casu, la obra, composición y retratu, execútase en taller.

Madoz, Premiu Nacional de Fotografía d’España nel añu 2000, xuega coles coses como lo fai un escritor coles palabres. Xenera un llinguaxe nuevu, mándase de les metáfores, los símiles, les aliteraciones, la paradoxa o l’oxímoron a la hora de xenerar conceptualmente les sos obres pa tresmitinos un mensaxe delicáu y rotundu. Una de les coses meyores de la obra de Madoz ye que fai pensar: el so trabayu ye un retu, un xuegu onde hai que topar tolos significaos –unes veces más claros y, otres, más ocultos– de la obra. Y ye, amás, un xuego onde la ironía ta presente y eso fai prestosa la relación coles semeyes.

Pa los que trabayamos nel tarrén creativu, na producción gráfica, Madoz ye un maestru. Depués de tantos años que lleva retratando ye difícil que nun tocara coles sos manes, p’asemeyalos, pa facer la so poesía, tolos elementos o oxetos que tenemos na mente.Y, amás d’abarcalo too, otra de les virtúes del fotógrafu madrilanu ye la pulcritú –lo curiosísimu que ye– na confección o manipulación de los elementos que retrata, qu’apaecen impecables a los nuestros güeyos, siempre en formes y xuntures perfectes. Asina, sobre eses formes amestaes, trama l’artista les sos lluces y sombres, los rellumos, les testures y los xuegos visuales pa parir una semeya onde siempre manda lo blanco, lo prieto y lo buxo.

La esposición que puede vese nel Muséu de Belles Artes d’Asturies hasta’l 3 de setiembre titúlase El Viaxeru inmóvil y ye un encargu de la so propietaria, la Fundación María Cristina Masavéu Peterson, que tien la sé en Madrid. Arranca con una instalación d’una proyección d’una catarata d’agua nel escenariu del teatru Campoamor. Un trabayu poco común na obra de Madoz, en colores. A esti audiovisual síguenlu hachos, cuernes, cáscares, lanchines, na llinia de los trabayos de Madoz anteriores. Rescampla una obra que ye un hachu de madera espetáu nun tablón, talláu na mesma pieza. Una obra que ye una escultura yá ella sola. Referencies a la madera y al fierru, relós, teatrinos de papel, botes de caza, mares y montes retrataos cola maestría que caracteriza al autor. Otres dos obres destaquen pola so concepción y pola so referencia directa a Asturies: una omega/ferradura y una sección d’un mapa xeográficu en relieve onde los montes surden perriba les ñubes nuna vista d’avión. Madoz cien por cientu. N’otra obra hai un xuegu guapu con dos zuecos que fain de túneles y tienen dientro una carretera de doble calzada. Esa ye la visión de les comunicaciones d’Asturies de Madoz.

Depués de vista la selección de trabayos, quedamos coles ganes de ver cómo Madoz xugaba con oxetos identitarios asturianos, y esa ye una gran pena y una gran perda, tanto pal artista como pal públicu. Prestaba ver qué coses vería‘l creador nunes madreñes, nun vasu sidra, nuna gaita, nuna piedra de carbón, qué xuegos podría plantear igual que lo fizo n‘otros trabayos con otru calzao, cacía, instrumentos musicales o elementos de la naturaleza. Quedamos sin saber qué otros significaos vería l‘artista nesos y otros oxetos simbólicos o d‘usu común d‘Asturies colos que nuca trabayó y que resulten fundamentales pa la expresión de la identidá, presente o pasada, del nuestru país, muncho más p‘alla de lo folclórico. La identidá define un territoriu y naz de la xeografía, el clima, la historia, la cultura, l‘atropoloxía, l‘idioma y munchos otros elementos. Asturies, como tolos países del mundu, tien una identidá, anque nunca se quixere emponderar dende concepciones centralistes del Estáu. La identidá asturiana nunca se salvaguardó nin proyectó por parte del poder nin de les clases pudientes, siempre foi‘l pueblu‘l que la caltuvo. Porque eso ye Asturies, la suma de munchos pueblos y aldees. Y dende esi puntu de vista aldeanu, identitariu, puede reivindicase la definición de lo que somos y enseñala al mundu.

La mirada de Chema Madoz sobre Asturies recoyida na muestra ye una mirada perdida y llonxana, que se constrúi más sobre xeneralidaes (mar, peña, monte) y con oxetos non asturianos. Ye una mirada castellana. Podía ser la mirada d‘un castellanu dende Castiella con una óptica asturiana, pero nun lo ye. Ye una mirada castellana a un país húmedu y con mar, poco definíu, que podía ser Canadá o Escocia. El comisariu de la esposición, Borja Casani, fala nel folletu promocional d‘abstracción. Nun hai nada de malo neso, Asturies pue mirase dende cualquier óptica y llugar. L‘artista ye llibre de facer, hasta ehí tamos d‘alcuerdu, y d‘interpretar el tema como-y paeza. Pero les imáxes de la esposición que faen una referencia directa a Asturies –les menos– tán feches con oxetos non asturianos. Y paez que choca pa mal nun artista que cuida tanto los detalles.

L‘artista retrata‘l mio país dende‘l d‘él –inmóvil– y eso ye una gran oportunidá y un gran retu. Pero yo soi quién a opinar si lu topo no retratao o non. Les obres, por elles, son mui bones, nun tienen tacha, pero la referencia al país nun ta resuelta. Una fueya d‘un árbol fecha de madera ye un cosa bien guapa pa simbolizar la nuestra masa de montes. La fueya podía ser de carbayu, de castañar, de faya o d‘ocalitu, especies mayoritaries del nuestru territoriu. Pero la fueya d‘esta esposición ye d‘arce. N‘otra de les obres, Madoz xuega con una mazana y con un árbol, y coles escales d‘esos dos elementos. La mazana ye de variedá golden, colos sos puntinos identificativos. Les variedaes de mazanes propies d‘Asturies, que son munches, tienen característiques visuales mui identificatives, les más d‘elles, con rayines qu‘amiesten colores contrastaos (colorao, verde, mariello). Madoz retrata una tabla de surf fecha con un trillu. La creatividá ye mui bona, la execución y el retratu de la obra son perfectes, pero la referencia, el mensaxe que manda esa obra ye de la España interior y mediterrania. N‘Asturies esi aperu nun forma parte de la so riqueza etnográfica. Nuna semeya concreta, sí que Madoz entra de frente a un elementu constructivu típicu asturianu: l‘horru. Y llevanta ún con unos pegollos y una casina d‘un páxaru. El resultáu ye decepcionante y remite más a un horru gallegu. La casetina ye rectangular y col teyáu a dos agües.

Igual pa la mentalidá y les maneres de ver de los países llanos y uniformaos les singularidaes de los países montañosos, onde de valle a valle hai elementos distintivos, -yos paez munchu esfuerzu teneles en cuenta. O igual ye pura abstracción.

¿Y estes coses tienen importancia? ¿Son caxigalines o repunancies del qu‘escribe? A fin de cuentes, una mazana ye una mazana, basta la referencia. Yo pienso que deberían tenela, porque si l‘oxetu del encargu ye una mirada d‘Asturies y la so xente, nun importa solo la calidá técnica de les semeyes, la calidá de lo retratao, importen tamién los mensaxes, les referencies. Y como tamos falando de composiciones con oxetos mui concretos y identificables, ye normal que rescamplen estos detalles. A cualquier español-y llamaría l‘atención que se dedicase una esposición a España y se retratara un toru watusi o un gochu vietnamita pa lanzar mensaxes abstractos sobre la fiesta nacional y el xamón ibérico. Too ye cuestión de la importancia que deamos a los detalles y del sentimientu identitariu. Sentise o non representáu, tresmitir un territoriu. Onde yo veo defecto, otros van ver virtú.

Tamién ye verdá que depende de la edá de los güeyos del que mira. Dalguién asturianu –mozu y urbanu–, igual nun echa nada en falta. Agora‘l mundu ye global, les referencies son comunes y los detalles nun importen, tan dilíos. Yá se crió nuna Asturies en decadencia onde lo identitario intentó borrase hasta facelo desapaecer de la que desapaecíen les aldees, les caseríes, les mines y too se convirtió en monte y nun parque temáticu de cartón piedra pa turistes con centros comerciales a la americana. Pero pa los que peñamos canes, la visión ye diferente.

¿Gústame que gracies a qu‘Asturies tien mar Madoz ficiera unes oles con tapetes? Sí, muncho. Pero diome pena nun topar más identidá nos elementos colos que trabaya. Porque me duel el too por Asturies pero ensin Asturies de munchos, y les miraes perdíes dende‘l centru a la periferia. Y ye una oportunidá perdida nesi sentíu –pa Madoz y pal desarrollu de la cultura y la creatividá– nun esperimentar con unos oxetos que, nun siendo en sentíu estrictu esclusivos d‘Asturies, sí la definen como territoriu y comunidá humana nel tiempu, porque tuvieron presentes na vida de los asturianos, tolos díes.

Con too y con ello, ye imprescindible visitar una esposición de la categoría d‘ésta de Madoz. Vayan a vela, nun la pierdan. Yo cuento volver.

(Por prohibición espresa de la Fundación Cristina Masavéu Perterson nun se puen facer semeyes de la esposición, asina que nun reproducimos nenguna con esta reseña).

El viaxeru inmóvil. Esposición de Chema Madoz.
Muséu de Belles Artes d‘Asturies, Uviéu.
Hasta‘l 3 de setiembre.

Be the first to comment

Leave a Reply

Tu dirección de correo no será publicada.


*