La obra del fotógrafu Dionisio González, nel Belles Artes

Trabayu de Dionisio González sobre la casa Celán.
Trabayu de Dionisio González sobre la casa Celán.

Dionisio González (Xixón, 1965) ye un fotógrafu y artista multidisciplinar asturianu. Na producción d’él améstase l’arquitectura, el diseñu, la fotografía y l’arte. Ye llicenciáu en Belles Artes y doctor pola Universidá de Sevilla, onde tamién trabaya como maestru. Amplió los estudios en grabáu y procesos fotográficos y multimedia en delles ciudaes europees (Lisboa, Devon , Edimburgo y Londres).

Trabaya desendolcando, polo xeneral, series y reflexona sobre les maneres d’habitar la ciudá y la naturaleza, les formes de vivir del sieglu XXI y les rellaciones que la humanidá entama col mediu natural. La mayoría de les obres que crea son semeyes, imaxes tomaes nun sitiu pol artista que depués modifica nel estudiu con ferramientes dixitales, nun procesu de reinvención de paisaxes suburbanos, munches veces mui recargaos y, otres veces, paisaxes naturales mui minimalistes. Precisamente nesta llinia de trabayu afondó nel proyectu, que se titula Construir, habitar, existimar, onde enseña series fotográfiques ya conocíes d’él aunque nunca s’espunxeren n’Asturies, como Thinking Central Park, Dauphin Islands y Dialectical Landscapes y tamién el proyectu nuevu Construir, habitar, existimar, que da’l títulu a la esposición y que se compón de dellos hologrames, maquetes y semeyes en color y blanco y negro. Na muestra, que pue vese nel Muséu de Belles Artes d’Asturies, enseña un trabayu preciosu sobre dos construcciones mítiques de la historia de la arquitectura, la casa Celán y la casa Madeleine, que yá nun existen pero que Dionisio González vuelve a edificar pa los nuestros güeyos.

La obra de González amesta realidá y ficción, y afonda nel estudiu de les posibilidaes diferentes d’estancia y habitación del ser humanu, y nes rellaciones ente la construcción y la destrucción. El puntu de partida siempre ye una semeya d’un escemariu real, –sía un paisaxe natural o un cachu de ciudá o de suburbiu onde l’home yá tien edificao–, depués l’artista crea una casa, fai d’arquitectu, y llevanta la so obra con formigón, fierro y cristal. Amás d’arquitectu, la dimensión na que plantea les soluciones nel trabayu d’él avéralu muncho al urbanista, pol interés na integración coles edificaciones que tán alredor de la obra nueva. Dionisio González ye un maestru de la lluz, por eso la obra naz d’un realidá a la que se añede una ficción y da como resultáu otra realidá incuestionable: la obra d’arte. Consigue la superación de lo real.

González llevó reconocimientos internacionales importantes, como’l Premiu Pilar Juncosa y Sotheby’s, el Premiu Fundació Pilar i Joan Miró, l’European Month of Fotography Arendt Award (Luxemburgo), etc. Obra d’él ta colingao en museos como’l Muséu Nacional Centru d’Arte Reina Sofía, el Museum of Contemporary Photography, de Chicago, y el Centru Nacional d’Arte Contemporaneu de París, y tamién en colecciones privaes d’importancia.

Construir, habitar, existimar
Dionisio González
Muséu de Belles Artes d’Asturies
Hasta’l 11 de febreru de 2018

Be the first to comment

Leave a Reply

Tu dirección de correo no será publicada.


*