La Pola Siero acueye la gala del IX Premiu al Meyor Cantar

Banda de Gaitas El Trasno | Foto: Palmira Escobar.
Banda de Gaitas El Trasno | Foto: Palmira Escobar.

El vienres 30 de setiembre, l’auditoriu municipal de La Pola Siero va acoyer la gala d’entrega del IX Premiu al Meyor Cantar, que tien como oxetivu principal escoyer el meyor tema n’asturianu o gallego-asturianu ente tolos que s’editaron nos años 2014 y 2015. El conciertu, onde van actuar los cinco finalistes d’esta convocatoria –Anabel Santiago, Bacotexo, Fernando Valle Roso, La Tarrancha y Vrienden–, va empezar a les 20 hores. A l’actuación de los finalistes va siguir un conciertu de la Banda de Gaitas El Trasno, ganadora de la edición anterior.

A la convocatoria d’anguaño podíen optar los temes orixinales n’asturianu o en gallego-asturianu editaos nos años 2014 y 2015, pola mor del paréntesis abiertu l’añu pasáu na convocatoria del premiu. La primer fase del concursu consistió na escoyeta de los cinco finalistes d’ente tolos cantares que se presentaron, una elección que tuvo al cargu d’un xuráu formáu por especialistes en música y llingua asturiana. Esti mesmu xuráu va ser tamién l’encargáu d’escoyer el cantar ganador depués de ver les cinco actuaciones en directo.

Ente los candidatos a llevar el premiu esti añu, Anabel Santiago ye bona conocedora d’esti premiu, pos non solo foi finalista nel añu 2008, sinón tamién xuráu en delles ediciones. Y ye qu’Anabel Santiago, con venti años de trayectoria musical, ye una de les voces más potentes de la tonada asturiana, con discos como Tierra de sueños (2001), Al son de la lluna (2003), Anabel Santiago canta a Diamantina Rodríguez (2005), Desnuda (2007), Agora (2010) o’l más recién, Llances de papel (2015), un discu poético-musical que recueye parte de los sos éxitos –dende tonaes clásiques hasta tangos– y onde s’inclúi’l cantar col que compite nesti certame: «La Lloca», con lletra del escritor Xulio Arbesú.

De la parte más occidental d’Asturies llega’l soníu de Bacotexo, otru veteranu del Premiu al Meyor Cantar, onde quedó finalista en dos ocasiones (2009 y 2012). Anguaño, preséntense col tema «Teatro valleiro», cantáu en gallego-asturianu y con lletra de Ricardo Saavedra, baxista del grupu. Formada nel branu del 2007, Bacotexo ye una banda de rock and roll que lleva la llingua del Navia-Eo como seña d’identidá. Precisamente, el so elepé A máquina del tempo (2008), foi’l primer discu de rock en gallego-asturianu. Los componentes de Bacotexo –Ricardo Saavedra, Daniel García y Marcos Nogueiro– tienen una trayectoria musical bien amplia y formaron parte de grupos como Babylon Chàt, Tierra de Nadie o Stro#.

Fernando Valle Roso ye l’únicu de los cinco finalistes que s’estrena nel escenariu del Premiu al Meyor Cantar, anque dende l’añu 2000 vien ganando dellos de los concursos de tonada más importantes, tanto en solitario como a dúu cola so hermana, Marisa Valle Roso. Nel so trabayu discográficu en solitario, recoyíu nos discos Camín d’ayures (2012) y Con estes y otres palabres(2016), axunta’l repertoriu tradicional de los compositores de primeros del sieglu XX y obres de creación actual, con lletres de poetes asturianos contemporáneos. Esti ye’l casu del cantar «A mano izquierda del mundu», con lletra d’Ismael Arias y col que se presenta a esta edición del Premiu al Meyor Cantar.

La Tarrancha participa pela tercer vez como finalista, esti añu col tema «Tuntu», un cantar d’amor con lletra de Delfín Valdés, Delfo, incluíu nel discu Elefantes na cacía (2015). La Tarrancha lleva, dende’l 2003, faciendo baillar cola so mezclienda d’estilos auto-nomada Mecigayu Ska. Les sos lletres son n’asturianu, anque tamién tienen canciones en gallego-asturianu y dos en castellanu. El so compromisu coles llingües llevólos a ser l’únicu grupu del estáu en sacar un discu en toles llingües de la península –Mezillingües (2014)–, pal que contaron cola collaboración de diecinueve artistes de procedencies estremaes. Amás de publicar en formatu de cedé, esta banda comparte tola so música al traviés d’Internet.

L’últimu de los participantes na final ye Vrienden, un grupu que yá se punxera énte’l xuráu del Premiu al Meyor Cantar na edición anterior. Nesta ocasión presenten el tema «Avérate», con lletra de Juan Duarte, vocalista del grupu y guitarra acústica. Amás d’él, la banda fórmenla Senén Fernández (baxu), Gonzalo Llao (flauta), Fausto Salvent (saxo), Pedro Santiago (bodrhán y caxón) y Nel Suárez (guitarra). Dende la so formació como dúu nel 2012, el soníu folk del principiu evolucionó hacia un enfoque de fusión, reconocíu en premios como los AMAS (Meyor discu folk nel 2013) o’l IX Folkez Blai, d’Ermua (Vizcaya).

Namás hai que dar una güeyada a la producción musical recién, de la qu’estos cinco grupos y solistes son un bon exemplu, pa decatase de que’l Premiu al Meyor Cantar ta cumpliendo col oxetivu pal que lu creó’l Gobiernu del Principáu d’Asturies: afalar a la creación contemporánea y orixinal de cantares n’asturianu y gallego-asturianu. Dende’l 2007, cuando se convocó esti gallardón pela primer vez, son munchos los grupos que s’animaron a incluir nos sos discos lletres orixinales nes llingües del país, y esto non solo ente les formaciones qu’usen l’asturianu y el gallego-asturianu de manera esclusiva o mayoritaria, sinón tamién naquelles que, hasta hai bien poco, namás se mandaben de llingües como’l castellanu o l’inglés nes sos lletres.

El númberu total de grupos participantes nestos años –más de cien ente les dos fases del concursu: la de preselección y la final– ye abondo significativu d’esta tendencia. De toos ellos, foron trenta y cuatro los que pasaron, como finalistes, pelos tres escenarios onde se foi celebrando esta gala: Teatru Filarmónica d’Uviéu, nel 2007; Casa de la Cultura de Mieres, del 2008 al 2011, y Teatru de la Llaboral, dende’l 2012 hasta’l 2014, escenarios a los que, esti 2016, se suma l’Auditoriu Municipal de Siero. En tou esti tiempu, el públicu qu’asistió en directu a la gala, o que la vio al traviés de la TPA, tien sentío una bayura d’estilos musicales –folk, rock, punk, ska, hip-hop, pop, tonada o canción d’autor–, que demuestren la vitalidá del asturianu y del gallego-asturianu como llingües de creación musical artística.

Be the first to comment

Leave a Reply

Tu dirección de correo no será publicada.


*