La revista Asturies fai venti años

Esti vienres 24 de xunu preséntase, a les 19:00 hores, nel Club de Prensa Asturiana, el númberu 36 de la revista Asturies. Memoria encesa d’un país, qu’edita la Fundación Belenos. Ye esta una publicación principal pal estudiu y espardimientu de la cultura del país, nacida en 1996, y que ta de norabona porque fai venti años yá. Nel actu van intervenir Ástur Paredes, responsable de la coordinación y diseñu de la revista, y Fernando Padilla, director xeneral de Planificación Llingüística y Normalización del Gobiernu d’Asturies.

La revista Asturies abarca temes tan amplios como los estudios d’historia, xeografía, filoloxía, etnografía, antropoloxía, folclor y otros, siempre con Asturies y la so relación colos países del arcu atlánticu como exa. Amás, fomenta la protección del patrimoniu cultural asturianu tanto material como inmaterial, amás de contribuir a la so catalogación y inventariu. Les sos páxines tienen mostrao tamién fondos arqueolóxicos, bibliográficos, fotográficos o documentales mui importantes, al tiempo que fomenta la investigación.

La edición d’Asturies. Memoria encesa d’un país ta de la mano de la Fundación Belenos, una organización asturiana ensin ánimu de beneficiu económicu qu’estiende les sos acciones a territorios venceyaos culturalmente a Asturies, dientro y fuera del Estáu español. Pa Inaciu Llope, miembru del conseyu editorial, «ye perimportante destacar que faiga venti años una revista escrita dafechu n’asturianu, con una temática tan especial; una publicación que nun ye académica pero que sí ye mui rigorosa y seguida pol públicu popular y académicu».

La revista tuvo nestos venti años collaboradores mui variaos qu’andecharon col so trabayu pal caltenimientu de cada númberu, y ente los que puen contase dende premios Nobel y Príncipe d’Asturies hasta profesores y investigadores universitarios o recopiladores y depositarios del saber popular. El so conseyu editorial tamién contó nesti tiempu con munchos y estremaos integrantes. Nesti númberu 36 tán Ástur Paredes, Berto Peña, Nacio Hevia Llabona, Dani Cueli, Xuan Xosé Fernandez Piloñeta y Lisardo Lombardía.

En cuantes al sostenimientu económicu, Llope señala que la revista «finánciase coles soscripciones de los socios, con daqué de publicidá, colos ingresos de les ventes y con ayudes públiques cuando les hai». Precisa que les ventes anguaño «van a menos» y que, en términos económicos, «cada númberu tien que poder financiar al siguiente ensin xenerar déficit». La revista Asturies tuvo una periodicidá de dos númberos añales, que pasó a ún en 2010 polos efectos de la crisis económica. A los editores prestaría-yos volver a recuperar la edición de dos númberos nesti añu que fain venti, pero reconocen que ye una empresa complicada. Llope nun pasa per alto qu’una de les señes d’identidá de la revista ye la calidá «artística» del diseñu editorial y de la impresión –en papel y en color–, con semeyes d’impactu visual gradísimu.

Nel actu d’esti vienres, la Fundación Belenos va repasar los llogros del so proyectu y la so idea matriz de que l’interceltismu ye una canal eficaz pa la visualización d’Asturies nun mundu globalizáu, siempre dende una identidá abierta. En palabres de Llope, tán «bien contentos d’ufiertar elementos racionales pa construir un discursu razonable, eficaz y asturianista pal sieglu ventiún». Y, viendo la calidá de los 36 númberos publicaos, la Fundación Belenos pue tar bien arguyosa por cumplir los sos fines y dignificar, d’esti mou, la llingua y la cultura d’Asturies.

Be the first to comment

Leave a Reply

Tu dirección de correo no será publicada.


*